‘நன்றி இல்லாதவர்’… ட்ரம்ப் – எலான் மஸ்க் நட்பு முறிவும், பரஸ்பர சாடல்களும்

அமெரிக்க அதிபர் டொனால்ட் ட்ரம்ப் மற்றும் தொழிலதிபர் எலான் மஸ்க் இடையேயான விரிசல் வெளிச்சத்துக்கு வந்தது

அமெரிக்க அதிபர் டொனால்ட் ட்ரம்பும், பிரபல தொழிலதிபர் எலான் மஸ்கும், ஒருவருக்கொருவர் திறந்தவெளியில் குற்றச்சாட்டுகளை முன்வைத்துவரும் நிலை உருவாகியுள்ளது.

“மஸ்க் உடன் எனக்கு இதற்கு முன் நல்ல உறவு இருந்தது. ஆனால் அது இப்போது தொடருமா என்றால் தெரியவில்லை. அவரிடம் நான் மிகுந்த ஏமாற்றத்தை உணர்கிறேன்,” என ட்ரம்ப் ‘தி ஓவல்’ அலுவலகத்தில் செய்தியாளர்களை சந்தித்தபோது கூறினார். இந்த உரையாடல் நேரலையில் ஒளிபரப்பப்பட்டது.

அதே நேரத்தில், மஸ்க் அரசின் புதிய வரி மசோதாவை விமர்சித்து, அதற்கு எதிர்ப்பு தெரிவித்தார். “மஸ்க் அந்த மசோதாவை நன்கு அறிந்தவர். ஆனால் தற்போது எதிர்ப்பது ஏன் என்பதை புரிந்து கொள்ள முடியவில்லை. அவரின் எதிர்ப்பை நான் பெரிதாகக் கருதவில்லை. ஆனால் இதை முன்பே அவர் தெரிவிக்க வேண்டும்,” என்று ட்ரம்ப் மேலும் தெரிவித்தார்.

இதற்குப் பதிலாக, எக்ஸ் வலைதளத்தில் மஸ்க் கடும் பதிலைத் தெரிவித்தார். “2024-ஆம் ஆண்டின் அதிபர் தேர்தலில் நானே ட்ரம்ப்பை வெற்றிபெறச் செய்தேன். ஆனால் அவர் நன்றியற்றவர். அந்த மசோதா எனது பார்வைக்கே வரவில்லை. இது இந்த ஆண்டின் முடிவில் பொருளாதாரத்தை பாதிக்கும். மேலும், ட்ரம்ப் எனது நிறுவனங்களின் ஒப்பந்தங்களை ரத்து செய்ய திட்டமிட்டுள்ளார்,” என்று அவர் குறிப்பிட்டார். இதையடுத்து ஸ்பேஸ் எக்ஸ் நிறுவனத்தின் டிராகன் திட்டம் நிறுத்தப்படுவதாகவும் கூறினார்.

அதிபர் பதவிக்காக ட்ரம்ப்பை மாற்றி துணை அதிபர் ஜே.டி. வான்ஸை நியமிக்க வேண்டும் என ஒரு பயனர் கருத்து தெரிவித்ததில், அதற்கு மஸ்க் ‘ஆம்’ என பதிலளித்தார்.

மேலும், புதிய அரசியல் கட்சி தொடங்க வேண்டுமா என்பது குறித்தும், எப்ஸ்டீன் ஃபைல்ஸ் விவகாரத்தில் ட்ரம்ப் சம்பந்தப்பட்டிருக்கிறாரா என்பதையும் மஸ்க் எக்ஸ் தளத்தில் வாக்கெடுப்பு மற்றும் கேள்விகளின் மூலம் பதிவு செய்துள்ளார்.

பின்னணி:

அமெரிக்க அரசு வெளியிட்ட புதிய பட்ஜெட் திட்டம் மீது ஏமாற்றம் ஏற்பட்ட காரணமாக, மஸ்க் கடந்த வாரம் அரசு செயல்திறன் துறையில் இருந்து விலகினார். ட்ரம்ப் இரண்டாவது முறையாக பதவியேற்ற பின், அரசின் செலவினங்களை கட்டுப்படுத்தும் நோக்கில் டிஓஜிஇ என்ற புதிய துறையை உருவாக்கியதில் மஸ்க் தலைமை வகித்தார். ஆண்டுக்கு 130 நாட்கள் சிறப்பு அரசு ஊழியராக பணியாற்றுவதாக அறிவிக்கப்பட்டிருந்தார்.

இந்த துறை பல பரிந்துரைகளை அரசுக்கு வழங்கியது. ஆனால் புதிய பட்ஜெட்டில் அவை பெரும்பாலும் புறக்கணிக்கப்பட்டிருந்தன. அதில் வரிச்சலுகைகள் அதிகம் வழங்கப்பட்டதோடு, ராணுவ செலவுகளும் அதிகரிக்கப்பட்டுள்ளன. இது எதிர்ப்புகளை கிளப்பியது.

முன்னதாக 2017-இல் ட்ரம்ப் வழங்கிய வரிச்சலுகையைப் போலவே தற்போது ஒரு குடும்பத்திற்கு ஆண்டு ஒன்றுக்கு $1,300 வருமானம் அதிகரிக்கக்கூடிய சலுகை வழங்கப்பட்டுள்ளது. நாடாளுமன்றத்தில் குறைந்த வாக்கு வித்தியாசத்தில் மசோதா நிறைவேற்றப்பட்டது.

மஸ்க் தனது பதவிக்காலம் முடிவடைந்ததை அறிவிக்கையில், “நிதி முறைகளை கட்டுப்படுத்தும் வாய்ப்பு அளித்ததற்காக ட்ரம்ப்க்கு நன்றி. ஆனால் தற்போதைய பட்ஜெட் திட்டம் நிதிச் சுமையை அதிகரிக்கிறது. இது பெரியதாக இருக்கலாம், அருமையாக இருக்கலாம். ஆனால் இரண்டும் சேர்ந்து இருக்குமா என்பது கேள்விக்குறியே,” என தெரிவித்துள்ளார்.

மேலும், மஸ்க் மீது அரசு பணியாற்றும் காலத்தில் போதைப்பொருள் பயன்படுத்தியதாக குற்றச்சாட்டுகள் எழுந்தது, ஆனால் அவர் அதை மறுத்துள்ளார்.