மதுரையில் காவலர் கொலை: விசாரணைக்காக அழைத்துச் செல்லப்பட்ட குற்றவாளி தப்பியோட முயன்றதால் காவல்துறை துப்பாக்கிச்சூடு – கைது செய்யப்பட்டவர் மருத்துவமனையில் அனுமதி
மதுரை மாவட்டத்தில் காவலர் மலையரசன் கொலை செய்யப்பட்ட வழக்கில் முக்கிய குற்றவாளியாக அடையாளம் காணப்பட்டவரை காவல்துறை விசாரணைக்காக சம்பவ இடத்திற்கு அழைத்துச் சென்றபோது, அவர் தப்பியோட முயன்றதால் போலீசார் துப்பாக்கி சூடு நடத்தி அவரை கட்டுப்படுத்தினர்.
கொலையின் பின்னணி
மதுரை விமான நிலையத்திற்குச் செல்லும் தேசிய நெடுஞ்சாலையில் உள்ள ஈச்சனேரி பகுதியில் கடந்த 19ஆம் தேதி, விருதுநகரைச் சேர்ந்த காவலர் மலையரசன் பாதி எரிந்த நிலையில் சடலமாகக் கண்டெடுக்கப்பட்டார். இந்த கொலை வழக்கை விசாரணை செய்ய மாவட்ட காவல்துறை தனிப்படைகளை அமைத்து தீவிரமாகக் கண்காணிப்பு மேற்கொண்டது.
விசாரணையின் போது, அவனியாபுரத்தைச் சேர்ந்த ஆட்டோ ஓட்டுநர் மூவேந்தர் என்பவரின் தொடர்பு இந்த வழக்கில் இருப்பது உறுதி செய்யப்பட்டது. இதையடுத்து காவல்துறை அவரை கைது செய்து விசாரணை மேற்கொண்டது.
குற்றவாளியின் வாக்குமூலம்
விசாரணையில், மூவேந்தரும் காவலர் மலையரசனும் பழக்கம் கொண்டவர்கள் என்பதும், அவர்கள் மது அருந்துவதற்காகக் கூட்டாகச் செல்லும் பழக்கம் இருந்ததும் தெரியவந்தது. மேலும், மலையரசன் வங்கிக் கணக்கில் அதிகளவில் பணம் இருப்பதை அறிந்த மூவேந்தர், தனது நண்பர்களுடன் சேர்ந்து அவரைக் கொலை செய்துவிட்டு, ஆதாரங்களை மறைக்க அவரது உடலை எரித்ததாக வாக்குமூலம் அளித்துள்ளார்.
தப்பியோட முயன்ற குற்றவாளி – போலீசார் துப்பாக்கிச் சூடு
இந்த வாக்குமூலத்தின் அடிப்படையில், காவல்துறையினர் மூவேந்தரைக் கைது செய்து, சம்பவம் நடந்த இடத்திற்கு நேரில் அழைத்துச் சென்று மேலதிக விசாரணை நடத்தினர். அப்போது, தப்பிப் போக முயன்ற மூவேந்தரை போலீசார் துப்பாக்கிச் சூடு நடத்தி கட்டுப்படுத்தினர்.
காலில் காயமடைந்த மூவேந்தர் மதுரை அரசு மருத்துவமனையில் அனுமதிக்கப்பட்ட நிலையில், அவருடன் இணைந்திருந்த மற்ற குற்றவாளிகளை கைது செய்ய காவல்துறையினர் தீவிரமாக தேடி வருகின்றனர்.
