கிறிஸ் கெயில், ட்ரெண்ட் போல்ட், லசித் மலிங்கா, சுனில் நரைன், குவிண்டன் டி காக், எய்டன் மார்க்ரம், அன்ரிக் நார்கியா, தப்ரைஸ் ஷம்சி உள்ளிட்ட பல முன்னணி வீரர்கள் தங்கள் நாட்டின் விளையாட்டு கடமைகளை விலக்கி வைத்து, தனியார் டி20 லீக்களில் அதிக கவனம் செலுத்தி வருவது காரணமாக, அந்த நாடுகள் பெரும் இழப்புகளை சந்திக்க வேண்டிய சூழ்நிலையை நாம் பார்த்து வருகிறோம்.
இப்போது, அதிரடியான ஆட்டத்தால் உலகம் முழுவதும் அச்சத்தை ஏற்படுத்திய ஹென்ரிச் கிளாசனும் சர்வதேச கிரிக்கெட்டில் இருந்து ஓய்வு அறிவித்துள்ளார்.
தென் ஆப்பிரிக்கா அணிக்கு சமீபத்தில் நடைபெற்ற நியூசிலாந்துக்கு எதிரான டெஸ்ட் தொடரில் முழுமையாக புதிய வீரர்களை மட்டுமே சேர்த்து அணியை உருவாக்க வேண்டிய நிலை ஏற்பட்டது. இதற்கு முக்கிய காரணம், முன்னணி வீரர்கள் தென் ஆப்பிரிக்க டி20 லீக் ஒப்பந்தக் கட்டுப்பாடுகளால் தேசிய அணிக்காக விளையாட முடியாத நிலைமை ஏற்பட்டதுதான்.
இதே டி20 லீக் காரணமாக, தென் ஆப்பிரிக்கா ஆஸ்திரேலியாவுக்கு எதிரான ஒருநாள் தொடரை கைவிட்டதும், 2023 உலகக் கோப்பைக்கான தகுதியில் அவர்களுக்கு சிக்கலான நிலைமை உருவானதும் குறிப்பிடத்தக்கது.
ஹென்ரிச் கிளாசன், கடந்தசாம்பியன்ஸ் டிராபி அரையிறுதியில் நியூசிலாந்தை எதிர்த்து கடைசி முறையாக விளையாடினார். 7 ஆண்டுகளாக சர்வதேச அரங்கில் போட்டியிட்ட இவர், 4 டெஸ்ட், 60 ஒருநாள் மற்றும் 58 டி20 போட்டிகளில் பங்கேற்றுள்ளார். குறிப்பாக, ஒருநாள் போட்டிகளில் 117.05 என்ற அபார ஸ்ட்ரைக் ரேட்டுடன் விளையாடிய நிலையில் ஓய்வு பெற்றுள்ளார்.
கிளாசன் ஆஸ்திரேலியாவுக்கு எதிராக 2023-ல் சென்சூரியனில் விளையாடிய அதிரடியான இன்னிங்ஸ் அனைவரது நினைவில் நீடிக்கத்தக்கது. 83 பந்துகளில் 13 பவுண்டரி, 13 சிக்ஸர்களுடன் 174 ரன்கள் அடித்து ஆஸ்திரேலிய பவுலிங் அணியை நெறிக்கெட்டார்.
அதேபோன்று, இந்தியாவில் நடந்த 2023 ஐசிசி உலகக் கோப்பியிலும் அவர் சிறப்பாக விளங்கினார். அரையிறுதிக்கு தென் ஆப்பிரிக்கா செல்ல அவருடைய பங்களிப்பு முக்கியமாக இருந்தது. 2024 டி20 உலகக் கோப்பை இறுதியில், இந்திய அணிக்கு எதிராக 27 பந்துகளில் 52 ரன்கள் விளாசி வீர்த்துப் பேச வைத்தார்.
கிளாசன் ஓய்வு பெறுவதற்கான முக்கியக் காரணங்களில் ஒன்று, தனியார் டி20 லீகுகளே. ஆனால், தென் ஆப்பிரிக்க கிரிக்கெட் வாரியமும் இதற்குப் பங்கு வகிக்கிறது. ஒப்பந்த வீரர் பட்டியலில் கிளாசனுக்கு இடம் தரப்படாமை, மேலும் வெள்ளைப்பந்து அணியின் பயிற்சியாளர் ஷுக்ரி கான்ராட், முழுமையான நாட்டுப் பற்று உள்ளவர்களே அணியில் இருக்கவேண்டும் என்ற திடமான நிலைப்பாடு எடுத்ததுமே கிளாசனின் முடிவுக்கு வித்திடுவதாக இருக்கலாம்.
ஓய்வு அறிவித்துக்கொண்ட கிளாசன், “இது எனக்கு மிகவும் வேதனையான நாள்” என கூறியுள்ளார். இது போன்ற நிலைகளைத் தடுப்பதற்காக, ஐசிசி மற்றும் தனியார் லீகுகளை நடத்தும் அமைப்புகள் சேர்ந்து தேசிய அணிக்காகவும் விளையாடும் வாய்ப்பை ஏற்படுத்தும் வகையில் ஒரு சரியான முறையை உருவாக்க வேண்டியது அவசியமாகிறது. இல்லையெனில், கிளாசன் போன்ற பெரும் திறமை கொண்ட வீரர்கள் சர்வதேச அரங்கில் இருந்து காணாமல் போய்விடுவார்கள்.
