சபரிமலையில் மிதுன மாதத்துக்கான மாதாந்திர பூஜைக்காக வரும் ஜூன் 14-ம் தேதி மாலை நடை திறக்கப்படவுள்ளது. இதற்கான ஆன்லைன் முன்பதிவுகள் இப்போது ஆரம்பிக்கப்பட்டுள்ளன.
ஐயப்பன் சிலையின் பிரதிஷ்டை தினத்தை முன்னிட்டு, சபரிமலையில் நேற்று மாலை ஒரு நாளைய சிறப்பு வழிபாட்டுக்காக நடை திறக்கப்பட்டது. அதன் தொடர்ச்சியாக இன்று (ஜூன் 5) அதிகாலை முதல் வழக்கமான பூஜைகள் நடைபெற்று வருகின்றன. இன்று இரவு 10 மணியளவில் சிறப்பு வழிபாடுகள் முடிந்த பிறகு நடை மீண்டும் மூடப்படும்.
இதேபோல், மாதாந்திர வழிபாடுகளுக்காக ஜூன் 14-ம் தேதி மாலை நடை மீண்டும் திறக்கப்படும். அன்றிலிருந்து 5 நாட்களுக்கு தொடர்ந்து சிறப்பு பூஜைகள் நடைபெறும். பிறகு, ஜூன் 19-ம் தேதி இரவு நடை சாத்தப்படும். இவ்வழிபாடுகளுக்கான ஆன்லைன் முன்பதிவுகள் தொடங்கி விட்டதால், பக்தர்கள் அதில் ஆர்வமுடன் பங்கேற்று வருகின்றனர்.
தற்போது கேரளாவில் தென்மேற்கு பருவமழை தீவிரமாக இருந்து வருவதால் தொடர்ந்து மழை பெய்து வருகிறது. இதனால், சபரிமலைக்கு செல்லும் பக்தர்களின் எண்ணிக்கை குறைவாக இருக்கக்கூடும் என்றாலும், பலர் முன்பதிவுகள் செய்து வழிபாடுகளில் கலந்து கொள்வதில் ஆர்வம் காட்டி வருகின்றனர்.
