தமிழகத்தில் பால் உற்பத்தி மற்றும் விநியோக வசதிகள்
பால்வளத்துறை அமைச்சர் மனோ தங்கராஜ் தெரிவித்ததாவது, தமிழகத்தில் தற்போது நாளொன்றுக்கு 50 லட்சம் லிட்டர் பாலை கையாளும் திறனை, 70 லட்சம் லிட்டராக அதிகரிக்க உட்கட்டமைப்பு வசதிகள் ஏற்படுத்தப்பட்டு வருகின்றன.
சேலத்தில் ரூ.51.62 கோடி செலவில் கட்டப்பட்ட, தினமும் 7 லட்சம் லிட்டர் பால் பதப்படுத்தும் அதிநவீன தானியங்கி தொழிற்சாலையை முதலமைச்சர் கடந்த 12-ம் தேதி தொடங்கி வைத்தார். அமைச்சர் இன்று இந்த ஆலையை பார்வையிட்டு, செயல்பாடுகளை ஆய்வு செய்தார்.
அவர் பின்னர் கூறியதாவது:
விவசாயிகள் சராசரியாக 6–7 லிட்டர் பாலை தினமும் உற்பத்தி செய்கின்றனர். இந்த அளவை 10–12 லிட்டராக உயர்த்தும் நோக்கில் நவீன தொழில்நுட்பங்கள் அறிமுகப்படுத்தப்பட்டுள்ளன. பால் உற்பத்தியாளர்களுக்கு உரிய பயிற்சிகளும் வழங்கப்பட்டுள்ளன.
முதல்வர் ஆட்சியை பொறுப்பேற்றவுடன், பாலை வாங்கும் விலை லிட்டருக்கு ரூ.3 உயர்த்தப்பட்டது. மேலும் தற்போது ரூ.3 ஊக்கத்தொகையும் வழங்கப்படுகிறது. தரமான பால் வழங்குவோருக்கு கூடுதலாக ரூ.1 வழங்க திட்டமிடப்பட்டுள்ளது.
சேலம் ஆவின் மூலம் கடந்த இரண்டு ஆண்டுகளில் ரூ.78 கோடி கடனுதவி மற்றும் ரூ.64 கோடி வட்டியில்லா கடன் வழங்கப்பட்டுள்ளது. விவசாயிகளுக்கு ரூ.6.50 கோடி லாப பங்கும், போனஸும் வழங்கப்பட்டுள்ளன.
மாநில அளவில் நாளொன்றுக்கு 70 லட்சம் லிட்டர் பாலை கையாளும் வகையில் புதிய திட்டங்கள் செயல்படுத்தப்பட்டுள்ளன. ஆவின் நிறுவனம், விவசாயிகளிடம் இருந்து நியாயமான விலையில் பாலை கொள்முதல் செய்கிறது. இதனால், பால் விலை நிலைத்திருக்கிறது.
மேலும், ஆவின் மூலம் இதுவரை ரூ.365 கோடி வட்டியில்லா கடனாக வழங்கப்பட்டுள்ளது. ஒரே ஆண்டில் ரூ.1,000 கோடி வரை விவசாயிகளுக்கு கடன் வழங்கப்பட்டுள்ளது. இந்த ஆண்டிலும் கூட்டுறவு வங்கிகளின் மூலம் கடன் உதவிகள் தொடரும்.
அமுல் ஒரு கார்ப்பரேட் நிறுவனம் என்றால், ஆவின் விவசாய நலனைக் குறிவைக்கும் நிறுவனம். ஆவின் கடைகளில் விதிமீறி பொருட்கள் விற்பனை செய்யப்பட்டால், அதற்கான நடவடிக்கைகள் எடுக்கப்படும் எனவும் அவர் கூறினார்.
