ஸ்டம்பர் பந்திலிருந்து டிஎன்பிஎல் வரை — கனிபாலனின் கிரிக்கெட் பயணம்
ஒவ்வொரு கிரிக்கெட் வீரரின் பின்னணியிலும் அவரது முயற்சிக்குத் தூண்டுகோலாக அமைந்த ஒரு வித்தியாசமான கதை இருக்கும். அப்படியான ஒருவர்தான் கனிபாலன். யூடியூப் வீடியோக்கள் மூலம் சுயமாக பயிற்சி பெற்று, கிரிக்கெட்டில் தனது தடமிட்டு வந்துள்ளார்.
ஸ்டம்பர் பந்துடன் தெருவில் கிரிக்கெட் ஆடிய கனிபாலன், தற்போது டிஎன்பிஎல் லீக்கில் விளையாடும் அளவுக்கு முன்னேறியுள்ளார். கோவிட் காலத்திலும் தனது கனவுகளை தள்ளிப் போடாமல், வாழ்வாதாரத்திற்காக ஒரு இ-காமர்ஸ் நிறுவனத்தில் டெலிவரி வேலையும் செய்துள்ளார். இந்தக் கடினமான பயணத்தில், தற்போது தனது இன்ஸ்டாகிராம் பக்கத்தின் (‘ஜேக் கோச்’) மூலமாக கிரிக்கெட் டிப்ஸ் வழங்கி பலரை ஈர்த்து வருகிறார். இந்த பக்கத்தை 67,300 பேர் பின்தொடர்கின்றனர்.
27 வயதான கனிபாலன், கடந்த பிப்ரவரியில் நடந்த டிஎன்பிஎல் 9-வது சீசனுக்கான ஏலத்தில், ஐட்ரீம் திருப்பூர் தமிழன்ஸ் அணியால் தேர்ந்தெடுக்கப்பட்டார். இது அவரின் நீண்ட நாள் முயற்சிக்கும், பொறுமைக்கும் கிடைத்த பரிசாகும்.
திருநெல்வேலியில் பிறந்து, தற்போது திருவொற்றியூரில் வாழும் கனிபாலன், “ஸ்டம்பர் பந்துகளை வைத்து நண்பர்களுடன் கிரிக்கெட் விளையாட துவங்கினேன். அப்போது ஏற்பட்ட ஆர்வம் தான் என்னை இவ்வளவு தூரம் கொண்டு வந்தது. சென்னையில் பெற்றோர் எதிர்ப்பு தெரிவித்ததால், கோடை விடுமுறையில் திருநெல்வேலிக்கே சென்று விளையாடினேன்,” என்கிறார்.
தொழில்முறை கிரிக்கெட் விளையாடும் ஆசை ஏற்பட்டபோதும், குடும்ப சூழ்நிலை காரணமாக கிரிக்கெட் கிட் வாங்க முடியாத நிலை ஏற்பட்டது. அந்த நேரத்தில் மற்றவர்கள் விளையாடுவதை கவனித்து தான் சுவாசித்தேன். இந்தப் பயணத்தில் முக்கியக் காரணியாக இருந்தவர் அவரது தம்பி. அவரே கனிபாலனை கிரிக்கெட் அகாடமியில் சேர்த்து, பயிற்சி பெற வைத்தார்.
ஆனால் இடையிலான சில சவால்கள் காரணமாக அகாடமியில் தொடர முடியாமல் போனதால், யூடியூப் வீடியோக்கள் மூலமாக பேட்டிங் பயிற்சி செய்து, தனது திறனை வளர்த்தார். “அதுவே கிரிக்கெட் அகாடமிகள் செய்கின்ற வேலை என்று எனக்குப் புரிந்தது,” என்கிறார்.
ஒரு நாள், அவரது அணித்தலைவனின் தந்தை, மாவட்ட அளவிலான போட்டிக்கு கனிபாலனின் பெயரில் விண்ணப்பித்தார். விக்கெட் கீப்பராக அவரது பெயர் குறிக்கப்பட்டிருந்ததால், பத்து நாட்களுக்குள் கீப்பிங் பயிற்சி மேற்கொண்டு, தினமும் 400–500 பந்துகளுக்கு மேல் கீப்பிங் செய்து தனது திறனை மேம்படுத்தினார். அதனால் தேர்வு சோதனையில் சிறந்து விளங்க, அணியில் இடம் பெற்றார்.
4-வது டிவிஷன் போட்டியில் சென்னை பிஎன்டி அணிக்காக ஆடி மூன்று அரை சதங்கள் அடித்தார். இது அவருக்குள் தொழில்முறை ஆட்டக்காரராக நம்பிக்கை உருவாக்கியது. அதன்பின், தனது அனுபவங்களை மற்ற இளம் கிரிக்கெட் ஆர்வலர்களுடன் பகிர விரும்பினார். வீடியோக்கள் மற்றும் நேரடி பயிற்சியினூடாக தற்போது பலருக்கும் வழிகாட்டியாக இருக்கிறார்.
“இந்த டிஎன்பிஎல் சீசனில் திருப்பூர் அணிக்காக விளையாடும் வாய்ப்பு கிடைத்தது என் வாழ்க்கையின் ஒரு முக்கியமான கட்டமாகும். இது எனக்கு பெரிய அனுபவம்,” என கனிபாலன் கூறுகிறார்.
