ஒடிசா மாணவி உயிரிழந்த சம்பவம் : யுஜிசி அமைத்தது உண்மைத் தேடல் குழு

ஒடிசா மாநிலத்தில், பாலியல் புகாருக்கு உரிய நடவடிக்கை இல்லாததால் தீக்குளித்த ஒரு கல்லூரி மாணவி, சிகிச்சை பலனின்றி உயிரிழந்த சம்பவம் நாடு முழுவதும் அதிர்ச்சியை ஏற்படுத்தியுள்ளது. இதனைத் தொடர்ந்து, பல்கலைக்கழக மானிய ஆணைக்குழு (UGC) இந்த விவகாரத்தை ஆய்வு செய்ய நான்கு பேர் கொண்ட விசாரணை குழுவை அமைத்துள்ளது.

இந்த குழுவின் தலைவராக, புதுடெல்லி குரு கோபிந்த் சிங் இந்திரபிரஸ்தா பல்கலைக்கழகத்தின் பேராசிரியர் ராஜ்குமார் மிட்டல் நியமிக்கப்பட்டுள்ளார். முன்னாள் யுஜிசி உறுப்பினர் சுஷ்மா யாதவ், குஜராத் பல்கலைக்கழக துணைவேந்தர் நீர்ஜா குப்தா ஆகியோரும் குழுவில் உறுப்பினர்களாக உள்ளனர். ஆஷிமா மங்லா என்பவர் ஒருங்கிணைப்பாளராக செயல்படுவார் என்று யுஜிசி அறிவித்துள்ளது.

இந்த குழு, மாணவியின் மரணத்திற்குக் காரணமான சூழ்நிலைகள் குறித்து முழுமையாக ஆய்வு செய்து, ஏழு நாட்களுக்குள் விசாரணை அறிக்கையை யுஜிசிக்கு தாக்கல் செய்யும். மேலும், உரிய பரிந்துரைகளையும் வழங்கும் என அறிவிக்கப்பட்டுள்ளது.

தீக்குளித்த மாணவி யார்? என்ன நடந்தது?

பாலசோர் மாவட்டத்தில் இயங்கி வரும் ஒரு தனியார் கல்வி நிறுவனத்தில், பி.எட் படித்து வந்த 20 வயது மாணவி ஒருவர், கல்வியியல் துறை தலைவர் சமிரா குமார் சாகுவின் தொடர்ச்சியான பாலியல் தொல்லைகளால் பாதிக்கப்பட்டதாக கூறப்படுகிறது. மாணவி, கல்லூரி புகார் குழுவை அணிந்து தனது புகாரை பதிவு செய்தாலும், அதற்கென எந்தவித நடவடிக்கையும் எடுக்கப்படவில்லை.

அதன்பின், கடந்த ஜூலை 12ம் தேதி, கல்லூரி முதல்வரை நேரில் சந்தித்தும் புகாரை வெளிப்படுத்தியுள்ளார். ஆனால், அதில் இருந்து சில மணி நேரங்களிலேயே அவர் கல்லூரி வளாகத்திலேயே தீக்குளித்ததாக கூறப்படுகிறது. அந்த நேரத்தில் உள்ளவர்கள் உடனே மருத்துவமனைக்கு அனுப்பி வைத்தனர்.

90% தீக்காயங்களுடன், மாணவி புவனேஸ்வரத்தில் உள்ள எயிம்ஸ் மருத்துவமனையில் அனுமதிக்கப்பட்டார். தொடர்ந்து ஆவலுடன் சிகிச்சை அளிக்கப்பட்டும், திங்கட்கிழமை இரவு அவர் உயிரிழந்தார்.

அதிர்ச்சியும் எதிர்ப்பும்

இந்த சம்பவம் ஒடிசா மாநிலத்தில் பெரும் அதிர்வலை எழுப்பியுள்ளது. பல்வேறு அரசியல் கட்சிகள் இதற்கு எதிராகக் குரல் கொடுத்து வருகின்றன. மாணவியின் மரணம் நீதிக்காக எழும் ஓர் உரக்க அழைப்பாக மாறியுள்ளது. இந்த விவகாரம் அரசியல் நிலைமையிலும் தாக்கத்தை ஏற்படுத்தியுள்ளது. பாஜக ஆட்சியில் நடைபெறும் இந்த விவகாரத்தால் கடுமையான எதிர்ப்பு எழுந்துள்ளது.

இதையடுத்து, மாணவி படித்த கல்லூரியின் முதல்வர் திலீப் குமார் கோஷ் கைது செய்யப்பட்டு, தற்போது 14 நாள் நீதிமன்ற காவலில் சிறையில் உள்ளார்.

இந்த விவகாரம், கல்வி நிறுவனங்களில் பாலியல் புகார்களுக்கு நேர்மையான விசாரணை மற்றும் நடவடிக்கை எடுப்பது எவ்வளவு அவசியம் என்பதை மீண்டும் வலியுறுத்தி நிற்கிறது.