69-வது ஓவருக்கு வரைக்கும் வாஷிங்டன் சுந்தரை களமிறக்காமல் வைத்ததற்குக் காரணம் என்ன? – இந்திய அணியின் வரலாற்றுச் சாதனையின் பின்னணியில் எழும் சர்ச்சைகள்!
லார்ட்ஸ் டெஸ்ட் போட்டியில் போராடிய பிறகும் தோல்வியைத் தழுவிய இந்திய அணி, அதனால் வீரர்களுக்கும் ரசிகர்களுக்கும் நெஞ்சில் புண்பட்டது. ஆனால், இப்போது மான்செஸ்டர் டெஸ்ட் போட்டியில் இந்திய அணியின் பேட்டிங், பவுலிங், ஷுப்மன் கில்லின் கேப்டன்சி, அணித் தேர்வு, மைதானத்திலான செயல்திறன், உடல் மொழி என அனைத்தும் குழப்பமானதாகவே இருந்தது. இத்தகைய திடீர் வீழ்ச்சிக்கு பின்னால் காரணம் என்ன என்பது பெரும் கேள்வியாக உள்ளது.
அதிலும் முக்கியமாக, லார்ட்ஸில் நடந்த போட்டியின் இரண்டாவது இன்னிங்ஸில் நான்கு விக்கெட்டுகளை வீழ்த்தி இந்தியாவை வெற்றிக்கு அருகே கொண்டு வந்த ஸ்பெஷலிஸ்ட் ஸ்பின்னர் வாஷிங்டன் சுந்தரை, இந்த போட்டியில் 69 ஓவர்களுக்குப் பிறகே பந்து வீச அனுமதித்தது, அவரைப் பற்றி அவமதிப்பு காட்டும் செயலில் கில், மோர்னி மோர்கெல் அல்லது கம்பீருக்கு எந்த உரிமையும் இல்லை.
கிரிக் இன்போ தரவுகளின்படி, கடந்த 10 ஆண்டுகளில் இந்திய அணி வெளிநாட்டு மண்ணில் ஒரு இன்னிங்ஸில் 500 ரன்களை எதிரணிக்கு கொடுத்ததே கிடையாது. ஆனால், அதற்கு முன்பாக அந்த புள்ளி விவரம் 16 முறை நிகழ்ந்திருக்கிறது.
அந்த 10 ஆண்டுகளில் ஷமி, பும்ரா, உமேஷ், இஷாந்த், புவனேஷ்வர் குமார் போன்றவர்கள் சிறப்பான உடற்தகுதி மற்றும் நிலைத்த ஃபார்முடன் விளங்கினர். ஆனால் தற்போது அந்த நிலை மாறிவிட்டது. பும்ரா, சிராஜ் ஆகியோரின் கால்கள் இப்போது சோர்ந்த நிலைக்குச் சென்றுவிட்டது. அன்ஷுல் காம்போஜ் பெயர் வெளியாகும் வரை எல்லோரும் யார் இவர் என்ற நிலை. அவரைப் பற்றி தெரிந்து கொண்டதும் கர்நாடகாவின் மித வேக பவுலர் வினய் குமாரின் ரீமேக் என்று அனைவருக்கும் புரிந்தது. 2012-ஆம் ஆண்டு ஆஸ்திரேலியாவில் பெர்த் டெஸ்ட்டில் வினய் குமார் 13 ஓவர்களில் 73 ரன்கள் கொடுத்து பலம் இழந்தார்.
அதேபோல, அன்ஷுல் காம்போஜ், “விக்கெட்டுக்கு பந்து வீச வந்தேன்… ஆனால் செம சாத்து வாங்கி வந்தேன்” என்ற நிலைக்குத் தள்ளப்பட்டார். ஷர்துல் தாக்கூரும் எப்படிப் பந்து வீசுகிறார் என்பது அவருக்கே தெரியாத நிலை. பயிற்சியாளர்கள் என்ன செய்கிறார்கள் என்பதும் தெரியவில்லை. போட்டியின் இரண்டாவது நாளில் அன்ஷுல் வீசிய பந்தின் வேகம் மணிக்கு 128 கிமீஐ கூட அடையவில்லை. மூன்றாவது நாளில் வேகம் மேலும் குறைந்து 125 கிமீக்கு வந்துவிட்டது. எதிர்பார்ப்பு எதுவும் நிறைவேறவில்லை.
இத்தகைய வேகப்பந்து நிலைமை உள்ளபோது, 6-வது ஸ்பெஷலிஸ்ட் பவுலராக சுந்தரை சீக்கிரமே களமிறக்க வேண்டியது அவசியம். ஆனால், ஷுப்மன் கில் 69 ஓவர்களுக்கு பிறகே அவரை களமிறக்கினார். அதுவும் 80 ஓவர் முடிந்து புதிய பந்து எடுப்பதற்குள் அவசரமாகவே அவர் கொண்டுவரப்பட்டார். அவரை விக்கெட்டை வீழ்த்தும் பவுலராக கருதாததற்கான சுட்டுவிரல் இந்த முடிவில் உள்ளது. அஸ்வினுக்கு பிறகு அணி பவுலிங்கில் நம்பிக்கை வைத்திருந்தவர் சுந்தர் என்பதை இந்த செயலால் கேள்விக்குள்ளாக்கிவிட்டார்கள்.
ஆனாலும் சுந்தரை களமிறக்கிய பிறகு அவர் ஆலி போப்பையும், ஆபத்தான ஹாரி புரூக்கையும் விக்கெட்டுக்கு அனுப்பினார். முன்னதாகவே அவரை கொண்டுவந்திருந்தால் ஜோ ரூட்டைத் தடுக்க வாய்ப்பு இருந்திருக்கலாம். ஒருவேளை இங்கிலாந்து அணியை ஆல்-அவுட் ஆக்கியிருக்கக்கூடும். இந்த வாய்ப்பை தவறவிட்டது கேப்டன் கிலின் பெரிய தவறே.
இந்த தவறில் தாம் எந்த பங்கும் இல்லை என மோர்னி மோர்கெல் தன்னை ஒதுக்கிக்கொள்கிறார். ஆனால் மேலாளர்கள் என்ன செய்துகொண்டிருந்தார்கள்? ஒருவராவது செய்தி சொல்லியிருக்க வேண்டாமா?
சஞ்சய் மஞ்சரேக்கர் இதைப் பற்றி, “கில்தான் சுந்தரை தாமதமாக கொண்டு வந்ததற்குப் பொறுப்பாளி. பும்ரா, ராகுல், கம்பீர் இப்படி செய்வார்கள் என்று நம்ப முடியாது. 69 ஓவர்களுக்குப் பிறகே அவரை களமிறக்கியதை என்னால் புரிந்து கொள்ள முடியவில்லை. என்ன மாதிரியான திட்டமிடல் இது? முந்தைய போட்டியில் இரண்டாவது இன்னிங்ஸில் நான்கு விக்கெட்டுகளை வீழ்த்தி தன்னை நிரூபித்திருந்தார். பென் ஸ்டோக்ஸ் சுலபமாக ஸ்பின் ஆடமுடியாதவர். ஆனால் அவரை எதிர்கொள்ளவோ, சுந்தருக்கு பந்துவீச வாய்ப்பளிக்கவோ தயங்கியிருக்கிறார் கில். இது என்ன மனநிலை?” என விமர்சித்துள்ளார்.
ரவி சாஸ்திரி கூட இதைப் பற்றி கடுமையாக விமர்சனம் செய்துள்ளார். தொடரை 1-1 என சமனாக்கிய நிலையில், காயங்கள் குழுவுக்கு பிரச்சனை தரலாம். ஆனாலும், திடீரென சாய் சுதர்சனை தேர்வு செய்வது, குல்தீப்பை அணியில் சேர்ப்பது பற்றிய எந்த விவாதமும் இல்லாமல், சுந்தரைக் கடைசியில் மட்டுமே களமிறப்பது, கம்பீரும் மற்ற பயிற்சியாளர்களும் பதிலே கூறாமல் அமைதியாக அமர்ந்திருப்பது, அன்ஷுல் காம்போஜை அணியில் சேர்ப்பதும், அதிலும் அவருக்கு புதிய பந்தும் வழங்கப்படுவது, அவர் 125 கிமீ வேகமே வீசும்போது மோர்னி மோர்கெல் அதைப் பற்றிப் பேசாமல் இருப்பது என அனைத்தும் குழப்பமானது. இந்த சூழ்நிலையில் யாராவது மையமாக இருந்து நிலையை தெளிவுபடுத்தாவிட்டால், கம்பீரின் பயிற்சி காலத்தில் இந்திய டெஸ்ட் அணி பெரிய வீழ்ச்சியைச் சந்திக்க நேரிடும்.
ஏற்கனவே நியூசிலாந்திடம் இந்திய மண்ணிலேயே முற்றிலும் தோல்வி, ஆஸ்திரேலியாவில் இழிவான தோல்வி, இப்போது இங்கிலாந்தில் தோல்வி… இவற்றிற்கெல்லாம் பதிலளிக்கும்போது திமிராக அல்லது கேலி சுருக்கமாக பேசும் அணித் தலைவர், பயிற்சியாளர், மேலாளர்கள் என அனைவரையும் மாற்றிவிட வேண்டிய அவசியம் உள்ளது. இல்லையெனில், இந்திய கிரிக்கெட் மிக விரைவில் பின்னடைவைக் காணும் அபாயம் உள்ளது.
