சிறந்த நடிகராக ஷாருக், நடிகையாக ராணி முகர்ஜி, சிறந்த துணை நடிகராக எம். எஸ். பாஸ்கர்: தேசிய திரைப்பட விருதுகள் வெளியீடு
மத்திய தகவல் மற்றும் ஒலிபரப்புத் துறையின் கீழ் நடத்தப்படும் 71-வது தேசிய திரைப்பட விருதுகள் டெல்லியில் நேற்று அறிவிக்கப்பட்டன. மொத்தம் 40 வகை பிரிவுகளில் வெற்றியாளர்கள் தெரிவு செய்யப்பட்டுள்ளனர்.
இதில், சிறந்த நடிகர் விருதுக்கு ஷாருக்கான் (ஜவான் – இந்தி படம்) மற்றும் விக்ராந்த் மாஸ்ஸி (12th Fail – இந்தி படம்) ஆகியோர் தேர்ந்தெடுக்கப்பட்டனர். ஜவான் படத்தை தமிழகத்தைச் சேர்ந்த இயக்குநர் அட்லீ இயக்கியிருப்பது குறிப்பிடத்தக்கது.
சிறந்த நடிகை விருது ராணி முகர்ஜிக்கு (மிஸஸ் சாட்டர்ஜி Vs நார்வே – இந்தி திரைப்படம்) வழங்கப்பட்டுள்ளது. சிறந்த துணை நடிகர் பிரிவில் எம். எஸ். பாஸ்கர் (பார்க்கிங் – தமிழ் படம்), விஜயராகவன் (பூக்காலம் – மலையாள படம்), சிறந்த துணை நடிகை பிரிவில் ஊர்வசி (உள்ளொழுக்கு – மலையாளம்), ஜான்சி போடிவாலா (வாஸ் – குஜராத்தி படம்) ஆகியோர் தேர்வு செய்யப்பட்டுள்ளனர். சிறந்த இயக்குநர் விருது சுதீப்தோ சேனுக்கு (தி கேரளா ஸ்டோரி – இந்தி) வழங்கப்பட்டுள்ளது.
சிறந்த இசை இயக்குநர் விருதுக்கு ஜி. வி. பிரகாஷ் குமார் (வாத்தி – தமிழ் பாடல்களுக்காக), ஹர்ஷவர்தன் (அனிமல் – இந்தி படத்தின் பின்னணி இசைக்காக) ஆகியோர் தேர்வு செய்யப்பட்டுள்ளனர்.
சிறந்த பின்னணி பாடகராக பிவிஎன்எஸ். ரோஹித் (பிரேமிஸ்துன்னா – பேபி – தெலுங்கு படம்), சிறந்த பின்னணி பாடகியாக ஷில்பா ராவ் (சலியா – ஜவான் – இந்தி படம்) ஆகியோர் தேர்வு செய்யப்பட்டுள்ளனர்.
சிறந்த பாடலுக்கான விருது கசர்லா ஷியாமுக்கு (ஊரு பல்லேட்டுரு – பல்லகம் – தெலுங்கு படம்), சிறந்த நடன அமைப்பாளருக்கான விருது வைபவி மெர்சண்டிற்கு (ராக்கி அவுர் ராணி கி பிரேம் கஹானி – திந்தோரா பஜே ரே – இந்தி), சிறந்த சண்டை அமைப்பாளருக்கு நந்து ப்ருத்வி (ஹனுமான் – தெலுங்கு), சிறந்த ஒளிப்பதிவாளராக பிரசாந்து மகோபாத்ரா (தி கேரளா ஸ்டோரி) ஆகியோர் தெரிவாகியுள்ளனர்.
சிறந்த திரைக்கதை மற்றும் வசனத்துக்கான விருது ராம் குமார் பாலகிருஷ்ணன் (பார்க்கிங் – தமிழ்), சாய் ராஜேஷ் நீலம் (பேபி – தெலுங்கு), தீபக் கின்கிரானி (சிர்ப் ஏக் பந்தா காபிஹே – இந்தி) ஆகியோருக்கு வழங்கப்பட்டுள்ளது. சவுண்ட் டிசைனுக்கான விருது சச்சின் சுதாகரன், ஹரிஹரன் முரளிதரன் (அனிமல் – இந்தி), சிறந்த எடிட்டிங்கிற்கு மிதுன் முரளி (பூக்காலம் – மலையாளம்) ஆகியோருக்கு அறிவிக்கப்பட்டுள்ளது.
சிறந்த தமிழ் திரைப்படமாக ‘பார்க்கிங்’ தேர்வாகியுள்ளது. இதற்காக தயாரிப்பு நிறுவனங்கள் சோல்சர்ஸ் பேக்டரி மற்றும் பேசன் ஸ்டூடியோவுடன் இயக்குநர் ராம் குமார் பாலகிருஷ்ணனுக்கும் விருது அறிவிக்கப்பட்டுள்ளது.
ஆவணப்பட பிரிவில், சிறந்த ஒளிப்பதிவிற்கான விருது சரவணமுத்து, சவுந்திரபாண்டி மற்றும் மீனாட்சி சோமன் (லிட்டில் விங்ஸ் – தமிழ் குறும்படம்) ஆகியோருக்கு வழங்கப்பட்டுள்ளது. ‘பார்க்கிங்’ திரைப்படம் சிறந்த தமிழ் படம், சிறந்த கதை வசனம் மற்றும் சிறந்த துணை நடிகர் ஆகிய மூன்று பிரிவுகளிலும் வெற்றிபெற்றுள்ளது.
‘பார்க்கிங்’ படத்துக்காக சிறந்த துணை நடிகர் விருது பெற்றது குறித்து எம். எஸ். பாஸ்கர் கூறியபோது, “இந்த விருதை பெறுவது எனக்கு பெருமையளிக்கிறது. தேர்வு குழுவினருக்கும், இந்த சிறந்த கதையை உருவாக்கிய இயக்குநர் ராம்குமார் பாலகிருஷ்ணனுக்கும் என் நன்றிகள். இப்படியாகவே வித்யாசமான கதைகளை தேர்வு செய்து, இயக்க வருகிற உதவி இயக்குநர்களுக்கு எனது வாழ்த்துகள்,” என்றார்.
