“எதிர்க்கட்சிகள் தொடர்ந்து அமளியில் ஈடுபட்டால், விவாதமின்றியே மசோதாக்கள் நிறைவேற்றப்படும்” – கிரண் ரிஜிஜு எச்சரிக்கை

நாடாளுமன்றத்தில் மசோதாக்கள் குறித்து விவாதங்களில் பங்கேற்காமல், எதிர்க்கட்சிகள் தொடர்ந்து அமளியில் ஈடுபடுமானால், அவை விவாதமின்றியே நிறைவேற்றப்படும் என நாடாளுமன்ற விவகாரங்கள் துறை அமைச்சர் கிரண் ரிஜிஜு தெரிவித்துள்ளார்.

மழைக்காலக் கூட்டத்தொடர் கடந்த ஜூலை 21ஆம் தேதி தொடங்கி, ஆகஸ்ட் 21ஆம் தேதி வரை நடைபெறவுள்ளது. இந்த 30 நாட்களில் 21 அமர்வுகள் நடத்த திட்டமிடப்பட்டுள்ளன. இருப்பினும், கூட்டத் தொடர் துவங்கிய நாளிலிருந்து எதிர்க்கட்சிகள் தொடர்ந்து அமளியில் ஈடுபட்டு வருகின்றன.

முக்கிய கோரிக்கைகள் மற்றும் நடவடிக்கைகள்

‘ஆபரேஷன் சிந்தூர்’ மற்றும் பீகார் மாநில வாக்காளர் பட்டியல் திருத்தம் உள்ளிட்ட விவகாரங்களில் ஒத்திவைப்புத் தீர்மானங்களை கொண்டு வந்து, அவைகளை விவாதிக்க வேண்டும் என வலியுறுத்திய எதிர்க்கட்சிகள், அவை நிகழ்ச்சிகளை தடைபடுத்தி வருகின்றன.

இதையடுத்து, ஆபரேஷன் சிந்தூர் விவகாரம் குறித்து விவாதம் நடத்தப்பட்டது. அதில் மக்களவை எதிர்க்கட்சித் துணைத் தலைவர் கவுரவ் கோகாய், மக்களவை எதிர்க்கட்சித் தலைவர் ராகுல் காந்தி உள்ளிட்டோர் கலந்து கொண்டு கேள்விகளை எழுப்பினர். பாதுகாப்புத் துறை அமைச்சர் ராஜ்நாத் சிங், உள்துறை அமைச்சர் அமித் ஷா மற்றும் பிரதமர் நரேந்திர மோடி ஆகியோர் பதிலளித்தனர்.

இப்போது, பீகார் மாநிலத்தில் நடைபெற்று வரும் வாக்காளர் பட்டியல் தீவிர திருத்தம் தொடர்பாக விவாதிக்கவேண்டும் என எதிர்க்கட்சிகள் கோரிக்கை விடுத்துள்ளன. ஆனால், இது தேர்தல் ஆணையத்தின் தன்னாட்சி நடவடிக்கை என்பதால், நாடாளுமன்றத்தில் இதை விவாதிக்க முடியாது என அரசு தரப்பில் தெரிவிக்கப்பட்டுள்ளது.

மசோதாக்களை விவாதமின்றி நிறைவேற்ற அரசு திட்டம்

இதையடுத்து, இன்று மக்களவையும் அமளி காரணமாக ஒத்திவைக்கப்பட்டது. இதைத் தொடர்ந்து செய்தியாளர்களிடம் பேசிய கிரண் ரிஜிஜு, “நாட்டிற்குத் தேவையான பல முக்கிய மசோதாக்கள் நிறைய உள்ளன. அவை விவாதிக்கப்படவேண்டும் என்பதே அரசின் விருப்பம். ஆனால், எதிர்க்கட்சிகள் தொடர்ந்து பரபரப்பான சூழல் உருவாக்கும் நிலையில், நாட்டு நலனுக்காகவே அவற்றை விவாதமின்றி நிறைவேற்ற வேண்டிய சூழ்நிலை உருவாகிவருகிறது,” என்றார்.

“தேசிய ஊக்கமருந்து எதிர்ப்பு திருத்த மசோதா, தேசிய விளையாட்டு நிர்வாக மசோதா ஆகியவை தொடர்பாக இரு நாட்கள் விவாதிக்க ஒப்புக்கொண்டனர். ஆனால் இன்று மக்களவை ஒத்திவைக்கப்பட்டதால், நாளையிலிருந்து இந்த மசோதாக்களை நிறைவேற்ற அரசு முன்னெடுப்பு எடுக்கும்” எனவும் அவர் கூறினார்.