மேற்கு இந்தியத் தீவுகள் மீது பாகிஸ்தான் வெற்றி

மேற்கு இந்தியத் தீவுகள் அணிக்கு எதிரான முதல் ஒருநாள் போட்டியில் பாகிஸ்தான் அணி 5 விக்கெட்கள் வித்தியாசத்தில் வெற்றி பெற்றது.

டிரினிடாட்டில் நேற்று முன்தினம் இரவு நடைபெற்ற இந்த ஆட்டத்தில், முதலில் பேட்டிங் செய்த மேற்கு இந்தியத் தீவுகள் அணி 49 ஓவர்களில் 280 ரன்கள் எடுத்து ஆட்டமிழந்தது. லீவிஸ் 62 பந்துகளில் 3 சிக்ஸர்கள், 5 பவுண்டரிகளுடன் 60 ரன்கள், கேப்டன் ஷாய் ஹோப் 55, ராஸ்டன் சேஸ் 53, மோதி 31 ரன்கள் எடுத்தனர். பாகிஸ்தான் பந்துவீச்சில் ஷாகீன் ஷா அப்ரீடி 4 விக்கெட்களையும், நசீம் ஷா 3 விக்கெட்களையும் பிடித்தனர்.

281 ரன்கள் இலக்கை நோக்கி பதிலடி கொடுத்த பாகிஸ்தான் அணி 48.5 ஓவர்களில் 5 விக்கெட்கள் இழப்பில் 284 ரன்கள் எடுத்து வெற்றியைப் பெற்றது. ஹசன் நவாஸ் 54 பந்துகளில் 3 சிக்ஸர்கள், 5 பவுண்டரிகளுடன் 63 ரன்கள், ஹூசைன் தலத் 41 ரன்கள் என ஆட்டமிழக்காமல் விளையாடினர். அதற்கு முன் ரிஸ்வான் 53, பாபர் அஸம் 47 ரன்கள் எடுத்தனர்.

இதன் மூலம் 3 ஆட்டங்கள் கொண்ட ஒருநாள் தொடரில் பாகிஸ்தான் 1-0 என முன்னிலை பெற்றுள்ளது.