சென்னை கிராண்ட் மாஸ்டர்ஸ் செஸ் போட்டி: சாம்பியன் பட்டத்தை நெருங்குகிறார் வின்சென்ட் கீமர்

சென்னையில் உள்ள நட்சத்திர ஓட்டலில் நடைபெற்று வரும் சென்னை கிராண்ட் மாஸ்டர்ஸ் செஸ் போட்டியின் 7-வது நாளான நேற்று 7-வது சுற்று ஆட்டங்கள் நடைபெற்றன.

இந்திய கிராண்ட் மாஸ்டரான விதித் குஜராத்தியை, சகநாட்டைச் சேர்ந்த கிராண்ட் மாஸ்டரான கார்த்திகேயன் முரளி 71-வது நகர்த்தலின் போது வீழ்த்தினார்.

உலக தரவரிசையில் 5-வது இடத்தில் உள்ள இந்திய கிராண்ட் மாஸ்டரான அர்ஜுன் எரிகைசி, நெதர்லாந்தின் அனிஷ் கிரி மோதிய ஆட்டம் 35-வது நகர்த்தலின் போது டிரா ஆனது.

புள்ளிகள் பட்டியலில் முதலிடம் வகிக்கும் ஜெர்மனியின் வின்சென்ட் கீமர், அமெரிக்காவின் அவாண்டர் லியாங்குடன் மோதினார். கருப்பு காய்களுடன் விளையாடிய வின்சென்ட் கீமர் 39-வது நகர்த்தலின் போது வெற்றி பெற்றார். முதல் 3 சுற்றுகளில் வெற்றிகளை குவித்திருந்த அவர், அடுத்த 3 சுற்றுகளையும் டிரா செய்திருந்தார். தற்போது 7-வது சுற்றில் மீண்டும் வெற்றி பாதைக்கு திரும்பியுள்ளார். இன்னும் 2 சுற்றுகள் மட்டுமே உள்ள நிலையில் 5.5 புள்ளிகளுடன் வின்சென்ட் கீமர் சாம்பியன் பட்டத்தை நெருங்கியுள்ளார்.

நெதர்லாந்தின் ஜோர்டன் வான் பாரஸ்ட், இந்தியாவின் வி. பிரணவ் மோதிய ஆட்டம் 98-வது நகர்த்தலில் டிராவில் முடிவடைந்தது. மற்றொரு ஆட்டத்தில் அமெரிக்காவின் ரே ராப்சனை, இந்தியாவின் நிஹால் சரின் 43-வது நகர்த்தலில் தோற்கடித்தார்.

சேலஞ்சர்ஸ் பிரிவு:

முழுமையாக இந்திய வீரர்கள் கலந்து கொண்ட சேலஞ்சர்ஸ் பிரிவு 7-வது சுற்றில் கிராண்ட் மாஸ்டரான ஹரிகா துரோணவல்லி, சர்வதேச மாஸ்டரான ஜி.பி. ஹர்ஷ்வர்தனிடம் 75-வது நகர்த்தலில் தோல்வியடைந்தார். மற்றொரு ஆட்டத்தில் ஆர். வைஷாலியை, எம். பிரனேஷ் 76-வது நகர்த்தலில் வீழ்த்தினார்.

ஆர்யன் சோப்ரா – அபிமன்யு புராணிக் மோதிய ஆட்டம் 37-வது நகர்த்தலில் டிரா ஆனது. திப்தாயன் கோஷ் – லியோன் லூக் மெண்டோன்கா மோதிய ஆட்டத்தில், லியோன் லூக் மெண்டோன்கா 52-வது நகர்த்தலில் வென்றார். பா. இனியன் – அதிபன் பாஸ்கரன் மோதிய ஆட்டம் 36-வது நகர்த்தலில் டிரா ஆனது.

7 சுற்றுகளின் முடிவில்:

• மாஸ்டர்ஸ் பிரிவு:

  வின்சென்ட் கீமர் – 5.5,

  அர்ஜுன் எரிகைசி – 4,

  முரளி கார்த்திகேயன் – 4,

  அனிஷ் கிரி – 3.5,

  அவாண்டர் லியாங் – 3.5,

  ஜோர்டன் வான் பாரஸ்ட் – 3.5,

  விதித் குஜராத்தி – 3,

  நிஹால் சரின் – 3,

  வி. பிரணவ் – 2.5,

  ரே ராப்சன் – 2.5.

• சேலஞ்சர்ஸ் பிரிவு:

  எம். பிரனேஷ் – 5.5,

  லியோன் லூக் மெண்டோன்கா – 5.5,

  அபிமன்யு புராணிக் – 5,

  அதிபன் பாஸ்கரன் – 4,

  பா. இனியன் – 4,

  திப்தாயன் கோஷ் – 3.5,

  ஜி.பி. ஹர்ஷ்வர்தன் – 3,

  ஆர்யன் சோப்ரா – 2,

  ஹரிகா துரோணவல்லி – 1.5,

  ஆர். வைஷாலி – 1.