கம்போடியா தலைவருடன் உரையாடல்: தாய்லாந்து பிரதமர் நீக்கம்
தாய்லாந்து – கம்போடியா நாடுகளுக்கிடையே எல்லை பிரச்சினை தொடர்ந்து நிலவி வருகிறது. இந்நிலையில், தாய்லாந்து பிரதமர் பேதோங்க்தான் ஷினவத்ரா மற்றும் கம்போடியா முன்னாள் பிரதமர், அந்நாட்டு செனட் சபைத் தலைவர் ஹுன்சென் ஆகியோருக்கு இடையே ஜூன் 15ஆம் தேதி தொலைபேசியில் நடந்த உரையாடல் வெளியானது.
அந்த உரையாடலில், அரசியல் சாசனத்துக்கு முரணாக தாய்லாந்து ராணுவ தளபதியை குறைத்து மதிக்கும் வகையிலான கருத்துகள் இடம்பெற்றதாக குற்றச்சாட்டு எழுந்தது. இதனால் ஷினவத்ராவுக்கு எதிராக போராட்டம் வெடித்து, அரசியல் சாசன நீதிமன்றத்தில் வழக்குப் பதிவு செய்யப்பட்டது.
இதன் பேரில் ஜூலை 1ஆம் தேதி அவர் பணியிலிருந்து இடைநீக்கம் செய்யப்பட்டார். தொடர்ந்து நடந்த விசாரணைக்குப் பிறகு, பிரதமராக பதவி வகிக்கும் தகுதியை இழந்துவிட்டதாகக் கூறி, நீதிமன்றம் நேற்று ஷினவத்ராவை பதவி நீக்கம் செய்ய உத்தரவிட்டது.
