முதல் காலாண்டில் நாட்டின் ஜிடிபி 7.8% வளர்ச்சி
நடப்பு 2025-26 நிதியாண்டின் முதல் காலாண்டில் (ஏப்ரல்–ஜூன்) நாட்டின் ஒட்டுமொத்த உள்நாட்டு உற்பத்தி (ஜிடிபி) 7.8% வளர்ச்சி அடைந்துள்ளது. இது எதிர்பார்க்கப்பட்ட 6.8%-ஐ விட அதிகமாகும்.
கடந்த 2024-25 நிதியாண்டின் முதல் காலாண்டில் நாட்டின் ஜிடிபி 6.5% ஆக இருந்தது. அதனுடன் ஒப்பிடும்போது, தற்போதைய ஜிடிபி 1.3% அதிகரித்துள்ளது. இது கடந்த 5 காலாண்டுகளில் இல்லாத உயர்வாகும். இதற்கு முன்பு, 2023-24 நிதியாண்டின் 4-வது காலாண்டில் நாட்டின் ஜிடிபி 8.4% ஆக இருந்தது. தற்போதைய அளவு அதற்கு அடுத்த நிலையாக பதிவாகியுள்ளது.
நடப்பு காலாண்டில் சீனாவின் ஜிடிபி 5.2% ஆக இருந்தபோதிலும், நம் நாட்டின் வளர்ச்சி 7.8%-ஐ எட்டியுள்ளது.
இதுகுறித்து பாஜக ஐ.டி. பிரிவு தலைவர் அமித் மாள்வியா சமூக வலைதளத்தில் வெளியிட்ட பதிவில் கூறியதாவது: “இந்தியாவின் பொருளாதாரம் 7.8% வளர்ச்சி அடைந்துள்ளது. இது சமீபத்தில் இந்தியா ‘இறந்த பொருளாதாரம்’ என கூறிய காங்கிரஸ் மூத்த தலைவர் ராகுல் காந்திக்கு பதிலடி ஆகும்” என்று தெரிவித்தார்.
