காத்மாண்டு விமான நிலையம் மூடல்: ஏர் இந்தியா, இண்டிகோ, ஸ்பைஸ் ஜெட் சேவைகள் நிறுத்தம்
நேபாளத்தில் போராட்டங்கள் தீவிரமடைந்ததால், அந்நாட்டின் தலைநகர் காத்மாண்டுவுக்கான விமான சேவைகள் தற்காலிகமாக நிறுத்தப்பட்டுள்ளன.
நேபாள அரசு பேஸ்புக், யூ டியூப், எக்ஸ் உள்ளிட்ட சமூக வலைதளங்களுக்கு திடீர் தடையை விதித்ததை எதிர்த்து நடந்த வன்முறையில் நேற்று 19 பேர் உயிரிழந்தனர்; 200க்கும் மேற்பட்டோர் காயமடைந்தனர். இன்று இரண்டாவது நாளாக போராட்டங்கள் தீவிரமாகி, சமூக ஊடக தடையை எதிர்த்து தொடங்கிய போராட்டம் ஊழல் எதிர்ப்புப் போராட்டமாகவும் மாறியதோடு, அரசாங்கத்துக்குள்ளும் எதிர்ப்புகள் எழுந்தன. இதையடுத்து பிரதமர் கே.பி.சர்மா ஒலி இன்று பிற்பகல் தனது பதவியிலிருந்து ராஜினாமா செய்தார்.
காத்மாண்டுவில் உள்ள திரிபுவன் சர்வதேச விமான நிலையம் தற்காலிகமாக மூடப்பட்டதால், ஏர் இந்தியா, இண்டிகோ, ஸ்பைஸ் ஜெட் ஆகிய விமான சேவை நிறுவனங்கள் அந்நகருக்கு செல்லும் மற்றும் அங்கிருந்து வரும் விமானங்களை ரத்து செய்துள்ளன.
போராட்டக்காரர்களால் ஏற்பட்ட தீயினால் ஏற்படும் புகை மூட்டத்தால் விமான நிலையம் மூடப்பட்டது. ஏர் இந்தியா அறிவித்தது:
“காத்மாண்டுவில் நிலவும் தற்போதைய சூழ்நிலையை கருத்தில் கொண்டு, டெல்லி – காத்மாண்டு – டெல்லி வழித்தடத்தில் இயங்கும் AI2231/2232, AI2219/2220, AI217/218 மற்றும் AI211/212 விமானங்கள் இன்று ரத்து செய்யப்பட்டுள்ளன. நிலைமையை தொடர்ந்து கவனித்து வருகிறோம்.”
இண்டிகோ தனது அறிவிப்பில் கூறியது:
“காத்மாண்டுவுக்குச் செல்லும் மற்றும் அங்கிருந்து புறப்படும் அனைத்து விமானங்களும் தற்போதும் நிறுத்தப்பட்டுள்ளன.”
அதேபோல், ஸ்பைஸ் ஜெட் நிறுவனமும் காத்மாண்டுவுக்கான அனைத்து விமானங்களும் ரத்து செய்யப்பட்டுள்ளதாக அறிவித்துள்ளது.
