‘நன்றி நண்பரே’ – பிறந்தநாள் வாழ்த்து தெரிவித்த ட்ரம்ப்புக்கு பிரதமர் மோடி ரிப்ளை
பிரதமர் நரேந்திர மோடிக்கு தொலைபேசி அழைப்பு மூலம் பிறந்தநாள் வாழ்த்து தெரிவித்தார் அமெரிக்க அதிபர் டொனால்டு ட்ரம்ப். இந்த சூழலில் அவரை தனது நண்பர் என குறிப்பிட்டு பிரதமர் மோடி நன்றி கூறியுள்ளார்.
கடந்த ஜூன் 17-ம் தேதிக்கு பின்னர் இரு நாட்டுத் தலைவர்களும் தொலைபேசியில் பேசிக் கொள்வது இதுவே முதல் முறை என தகவல் வெளியாகியுள்ளது. இந்தியாவுக்கு அமெரிக்கா விதித்துள்ள 50% வரி நடவடிக்கை இருநாட்டு உறவில் சற்றே விரிசலை ஏற்படுத்தியுள்ளது. இதில் ரஷ்யாவிடமிருந்து இந்தியா தொடர்ந்து கச்சா எண்ணெய் இறக்குமதி செய்து வருவதால் கூடுதலாக 25% வரியையும் அமெரிக்கா விதித்துள்ளது. இந்த சூழ்நிலையில்தான் பிரதமர் மோடி மற்றும் ட்ரம்ப் தொலைபேசியில் பேசியுள்ளனர்.
“தொலைபேசி அழைப்பில் எனக்கு பிறந்தநாள் வாழ்த்து தெரிவித்த என் நண்பர், அதிபர் ட்ரம்ப்புக்கு நன்றி. இந்தியா மற்றும் அமெரிக்கா இடையிலான உலகளாவிய கூட்டாண்மையை புதிய உயரத்துக்கு கொண்டு செல்ல தங்களைப் போலவே நானும் உறுதியாக உள்ளேன். உக்ரைனில் அமைதியான தீர்வு காண நீங்கள் மேற்கொள்ளும் முயற்சிகளை நாங்கள் முழுமையாக ஆதரிக்கிறோம்” என்று பிரதமர் மோடி எக்ஸ் தளத்தில் தெரிவித்துள்ளார்.
