தென்னிந்திய நடிகர் சங்கப் பொதுக்குழுக் கூட்டம் செப்டம்பர் 21-ம் தேதி சென்னையில் நடைபெறுகிறது. கடந்த சில ஆண்டுகளாக நடிகர் சங்கப் பொதுக்குழுவில் மூத்த கலைஞர்களுக்கு வாழ்நாள் சாதனையாளர் விருது வழங்கி கவுரவித்து வருகின்றனர். அதன்படி, இந்த ஆண்டுப் பொதுக்குழுவில் மூத்த நடிகை எம். என். ராஜம் அவர்களுக்கு விருது வழங்கப்பட உள்ளது.
நடிகை எம். என். ராஜம், 1950 முதல் 1960-களின் இறுதி வரை முன்னணி நடிகையாகத் திகழ்ந்தவர். ரத்தக்கண்ணீர், பெண்ணின் பெருமை, புதையல், தங்கப்பதுமை, நாடோடி மன்னன், பாசமலர், தாலி பாக்கியம், அலிபாபாவும் 40 திருடர்களும் உள்ளிட்ட சுமார் 200 படங்களில் நடித்துள்ளார்.
சமீபத்தில் 90-வது பிறந்த நாளைக் கொண்டாடிய அவருக்கு, நடிகர் சங்க பொதுக்குழுக் கூட்டத்தில் வாழ்நாள் சாதனையாளர் விருது வழங்கப்பட உள்ளது. இதற்காக நடிகர் சங்க பொருளாளர் கார்த்தி மற்றும் துணைத்தலைவர் பூச்சி எஸ். முருகன் அவரை நேரில் சந்தித்து அழைப்பை வழங்கினர்.
