அர்ஜென்டினாவில் வெளியாகும் ‘ஆல் வி இமேஜின் அஸ் லைட்’!
மும்பையைச் சேர்ந்த பாயல் கபாடியா இயக்கிய படம், ஆல் வி இமேஜின் அஸ் லைட். இதில் கனி குஸ்ருதி, திவ்யா பிரபா, சாயா கதம், ஹிருது ஹாரூண் உள்ளிட்டோர் நடித்துள்ளனர்.
கேரளாவைச் சேர்ந்த இரண்டு செவிலியர்களின் மும்பை வாழ்க்கையைப் பற்றிய கதையை கொண்ட படம் இது. 77-வது கேன்ஸ் திரைப்பட விழாவில் கிராண்ட் பிரி விருதைப் பெற்று சாதனை படைத்தது. இதைத் தொடர்ந்து கோல்டன் குளோப் விருதுக்கான சிறந்த இயக்குநர் மற்றும் சிறந்த வெளிநாட்டுத் திரைப்படம் பிரிவுகளில் பரிந்துரைக்கப்பட்டது. ஆனால், விருது கிடைக்கவில்லை.
இந்நிலையில், இப்போது இந்தப் படம் அர்ஜென்டினாவில் வெளியாகியுள்ளது. அங்கு வெளியிடும் நிறுவனம் லக்ஸ்பாக்ஸ் பிலிம்ஸ். அந்நிறுவனம் அர்ஜென்டினா போஸ்டருடன் இதை அறிவித்துள்ளது. அந்நாட்டின் பல்வேறு பகுதிகளில் அம்மொழியில் டப் செய்து படம் வெளியாகியுள்ளது.
