எச்1பி விசா கட்டண உயர்வு தாக்கம்: திறமையான இந்தியர்களை கவர ஜெர்மனி, பிரிட்டன் தீவிரம்
அமெரிக்கா, எச்1பி விசா கட்டணத்தை திடீரென உயர்த்திய நிலையில், திறமையான இந்தியர்கள் அமெரிக்காவுக்குச் செல்வதைத் தடுக்கும் முயற்சியாக இது கருதப்படுகிறது. இதனால், ஜெர்மனியும் பிரிட்டனும் தங்கள் நாட்டில் வேலை வாய்ப்புகளுக்காக இந்தியர்களை வரவேற்க முனைந்துள்ளன.
அமெரிக்காவில் தற்காலிக பணிக்கான எச்1பி விசா கட்டணம் ரூ.1.32 லட்சத்தில் இருந்து ரூ.88 லட்சமாக உயர்த்தப்பட்டுள்ளது. இந்திய மென்பொருள் நிபுணர்களை அமெரிக்க நிறுவனங்களில் சேராமல் தடுக்க இது மறைமுக நடவடிக்கையாக பார்க்கப்படுகிறது. இந்த முடிவுக்கு அந்நாட்டு தொழில்நுட்ப வல்லுநர்களும், தொழிலதிபர்களும் கடும் எதிர்ப்பு தெரிவித்துள்ளனர்.
இதனிடையே, இந்திய திறமைகளை ஈர்க்க ஐரோப்பிய நாடுகள் முயற்சி மேற்கொண்டு வருகின்றன. இந்தியாவுக்கான ஜெர்மனி தூதர் பிலிப் அகெர்மான், தகவல் தொழில்நுட்பம், மேலாண்மை, அறிவியல் உள்ளிட்ட துறைகளில் சிறந்த வேலை வாய்ப்புகள் உள்ளன என்றும், இந்தியர்கள் ஜெர்மனிக்கு வரவேண்டும் என்றும் அழைப்பு விடுத்துள்ளார். அவர் கூறியதாவது:
“ஜெர்மனியில் அதிக வருமானம் ஈட்டுபவர்களில் இந்தியர்கள் முன்னிலையில் உள்ளனர். எங்கள் சமூகத்துக்கும் நாட்டிற்கும் அவர்கள் அதிக பங்களிப்பு செய்வதால், அதிகம் சம்பாதிக்கிறார்கள். நாங்கள் கடின உழைப்பையும் திறமையையும் மதிக்கிறோம். எங்கள் குடியேற்ற கொள்கை நம்பகத்தன்மை, நவீனத்தன்மை, நிலைத்தன்மை கொண்டது. இந்திய திறமைகளை வரவேற்கிறோம்; உங்களை எதிர்கொள்கிறது பல வாய்ப்புகள்” என்றார்.
பிரிட்டன் நிதி அமைச்சர் ரேச்சல் ரீவ்ஸ் கூறியதாவது:
“உயர் திறமை கொண்ட பணியாளர்கள் பிரிட்டனுக்கு வருவதற்கான நடைமுறைகள் எளிதாக்கப்படும். அமெரிக்காவைப் போல சிக்கலான சூழ்நிலை அல்லாமல், லண்டன் உலகளாவிய திறமைகளை வரவேற்கிறது” என்றார்.
இதற்கிடையில், சீனாவும் ‘கே விசா’ என்ற புதிய விசாவை அக்டோபர் 1 முதல் அறிமுகப்படுத்துகிறது. இது நெகிழ்வானதாக இருக்கும்; எத்தனை முறை வேண்டுமானாலும் பயணம் செய்யலாம். நிறுவன அழைப்பு தேவையில்லை; விருப்பமுள்ளவர்கள் நேரடியாக விண்ணப்பிக்கலாம் என சீன அரசு தெரிவித்துள்ளது.
