ஹாக்கி இந்தியா லீக் 7-வது சீசன்: லியாம் ஹென்டர்சன் ரூ.42 லட்சத்தில் ஏலம்
ஹாக்கி இந்தியா லீக்கின் 7-வது பருவ ஆடவர் போட்டிக்கான மினி வீரர் ஏலம் டெல்லியில் நேற்று நடைபெற்றது. இதில் வேதாந்தா கலிங்கா லான்சர்ஸ் அணி, ஆஸ்திரேலிய டிபன்டர் லியாம் ஹென்டர்சனை ரூ.42 லட்சத்திற்கு பெற்றது. நெதர்லாந்து டிபன்டர் சாண்டர் டி விஜ்னை தமிழ்நாடு டிராகன்ஸ் அணி ரூ.36 லட்சத்தில் வாங்கியது.
யுபி ருத்ராஸ் அணி விலகிய நிலையில், அந்த அணியை ஹாக்கி இந்தியா லீக் நிர்வாகக்குழு தற்காலிகமாக மேலாண்மை செய்கிறது. இந்த அணிக்காக ஜெர்மனியின் தீஸ் பிரின்ஸ் ரூ.36 லட்சத்தில் ஏலம் எடுக்கப்பட்டார்.
இந்திய வீரர்களில், இளம் கோல்கீப்பரான விவேக் லக்ராவை ரூ.23 லட்சத்தில் ஷ்ராச்சி ரார் பெங்கால் டைகர்ஸ் பெற்றது. யு-21 அணியின் நடுக்கள வீரர் அட்ரோஹித் ஏக்காவை ரூ.11 லட்சத்தில் தமிழ்நாடு டிராகன்ஸ் வாங்கியது.
14 வயது இளம் திறமையான கேதன் குஷ்வாஹாவை ரூ.2.5 லட்சத்தில் பெங்கால் டைகர்ஸ் பெற்றது. சீனியர் வீரர் ரூபிந்தர் பால் சிங்கை ரூ.12 லட்சத்தில் எஸ்ஜி பைப்பர்ஸ் அணி வாங்கியது.
