“இந்தியா–பாகிஸ்தான் வீரர்கள் நடத்தை வருத்தம் தருகிறது; தலைகுனிவு நிலை” – சையத் கிர்மானி
சமீபத்தில் நடைபெற்ற ஆசியக் கோப்பை கிரிக்கெட் தொடரில், இந்தியா–பாகிஸ்தான் அணிகளின் நடத்தை விளையாட்டை விட அரசியலால் ஆக்கிரமிக்கப்பட்டதாக இருந்தது என்று முன்னாள் விக்கெட் கீப்பர் மற்றும் 1983 உலகக் கோப்பை வெற்றிக்கான நாயகர்களில் ஒருவரான சையத் கிர்மானி கடும் ஏமாற்றத்துடன் தெரிவித்துள்ளார்.
இரு அணிகளின் வீரர்களும் மிகுந்த திமிருடனும் நாகரிகமற்ற முறையிலும் நடந்துகொண்டதாக அவர் குற்றம்சாட்டினார். “இப்போது கிரிக்கெட் ஆடப்படும் விதம் ‘ஜெண்டில்மேன்கள் ஆட்டம்’ என்று அழைக்கப்படும் தரத்திலே இல்லை. மைதானத்தில் காட்டப்படும் அநாகரிகமான நடத்தை, மனதை புண்படுத்துகிறது. இந்திய அணி என்ன செய்கிறது? அரசியல் ஏன் மைதானத்தில் புகுகிறது? என்ற கேள்விகள் பலரும் எழுப்புகின்றனர். இத்தகைய நிலையை பார்த்தால், எனக்கு வீரராகவே வெட்கமாக இருக்கிறது” என்று கிர்மானி வேதனை வெளிப்படுத்தினார்.
ஏ.என்.ஐ.க்கு அளித்த பேட்டியில் அவர் மேலும் கூறியதாவது:
“இன்றைய காலகட்டத்தில் கிரிக்கெட் முற்றிலும் மாறிவிட்டது. ஆசியக் கோப்பையில் நடந்த நிகழ்வுகள் ஏற்றுக்கொள்ள முடியாதவை. விளையாட்டில் அரசியல் கலக்கக் கூடாது. மைதானத்திற்கு வெளியே என்ன நடந்தாலும், அதை விளையாட்டுடன் தொடர்புபடுத்த வேண்டாம். கிரிக்கெட் ஒரு உயர்ந்த விளையாட்டு; அதை அரசியலுடன் சேர்த்துவிடுவது தவறு. வீரர்கள் அதனை உயர்ந்த நோக்கங்களுக்காக அர்ப்பணிக்க விரும்பினாலும், அரசியலின் தாக்கத்திலிருந்து விலகியே இருக்க வேண்டும்.”
தனது காலத்தை நினைவுகூர்ந்த கிர்மானி, “எங்களுடைய காலத்தில் எவ்வளவு அன்பும் நட்பும் காணப்பட்டன. பாகிஸ்தான் வீரர்கள் இந்தியாவுக்கு வந்தால் நாங்கள் அன்புடன் வரவேற்போம். நாங்கள் அங்கே சென்றால் அதே பாசத்தையே பெற்றோம். அந்த அற்புதமான உறவை நினைத்துப் பார்த்தால், இன்றைய நிலை மனதை புண்படுத்துகிறது. இன்று ஒரு கிரிக்கெட் வீரராக, என் தலையை குனிய வேண்டிய சூழல் ஏற்பட்டுள்ளது” எனக் குறிப்பிட்டார்.
