பிஹார் தேர்தல் மேடையில் செல்வாக்கை செலுத்தவிருக்கும் ஆறு தலைவர்கள் – ஒரு பார்வை

பிஹார் சட்டமன்றத் தேர்தல் நவம்பர் 6 மற்றும் 11 ஆகிய தேதிகளில் இரு கட்டங்களாக நடைபெறுகிறது. வாக்கு எண்ணிக்கை நவம்பர் 14 அன்று நடைபெறும் என அறிவிக்கப்பட்டுள்ளது. இந்நிலையில், பிஹார் அரசியல் களத்தில் ஆட்சியைப் பிடிக்கப் போகும் முக்கிய ஆறு தலைவர்களைப் பற்றி பார்க்கலாம்.

நரேந்திர மோடி:

மக்களவைத் தேர்தலாக இருந்தாலும், சட்டமன்றத் தேர்தலாக இருந்தாலும், வட மாநிலங்களில் பாஜகவின் முகம் பிரதமர் நரேந்திர மோடிதான். பிஹாரிலும் அவரே கட்சியின் முக்கிய தலைவராக கருதப்படுகிறார். இதற்காகவே அவர் சமீப மாதங்களில் பலமுறை பிஹாருக்கு பயணம் செய்து பல திட்டங்களை அறிவித்து தொடங்கிவைத்துள்ளார்.

இந்த முறை பிஹாரில் தனிப்பெரும்பான்மை பெற்று ஆட்சியை அமைக்க பாஜக விரும்புகிறது. அதற்கேற்ப பிரதமர் மோடி பிரச்சாரத்திற்கான வியூகங்களைத் தீட்டுவார் என்று கூறப்படுகிறது. பிஹாரில் ஜேடியு தலைவர் நிதிஷ் குமார், அல்லது எதிர்க்கட்சியின் தேஜஸ்வி யாதவ் போன்ற மக்கள் ஆதரவு பெற்ற தலைவர்கள் பாஜகவில் இல்லை என்பதால், மோடிதான் பிஹாரில் பாஜகவின் முக்கிய முகமாக உள்ளார்.

நிதிஷ் குமார்:

2005 முதல் இதுவரை 20 ஆண்டுகளாக பிஹாரின் முதல்வராக பணியாற்றி வருகிறார் நிதிஷ் குமார். இடைப்பட்ட 278 நாட்கள் மட்டுமே ஜிதன் ராம் மாஞ்சி அந்தப் பதவியில் இருந்தார். இந்த முறை மீண்டும் முதல்வர் பதவிக்கான முக்கிய வேட்பாளராக நிதிஷ் குமார் கருதப்படுகிறார். “முதல்வர் மாற மாட்டார், கூட்டணி மட்டுமே மாறும்” என்ற வாசகம் பிஹாரில் பிரபலமான சொல்லாகியுள்ளது.

முன்னைய தேர்தலில் பாஜகவைவிட குறைவான இடங்களில் வெற்றி பெற்றார். எனவே இம்முறை ஆட்சியின்மீதான அதிருப்தியை சமாளிக்க, மகளிர், விவசாயிகள், பத்திரிகையாளர்கள் உள்ளிட்ட பல தரப்பினருக்கு நலன்திட்டங்கள் வழங்கி வருகிறார்.

தேஜஸ்வி யாதவ்:

பிஹாரின் முன்னாள் முதல்வர் லாலு பிரசாத் யாதவின் மகனும், அவரது அரசியல் வாரிசுமான தேஜஸ்வி யாதவ், ஆர்ஜேடி கட்சியின் தலைவராக உள்ளார். 2020 தேர்தலில் பாஜகவிற்கு அடுத்தபடியாக அதிக இடங்களை வென்று தனது கட்சியை இரண்டாவது பெரிய சக்தியாக ஆக்கியார். இம்முறை ஆட்சியை மீண்டும் கைப்பற்ற வேண்டும் என்ற உறுதியுடன் செயல்படுகிறார்.

லாலு பிரசாத்தின் உடல்நிலை, குடும்பத்துக்குள் உள்ள கருத்து வேறுபாடுகள், மற்றும் யாதவ்-முஸ்லிம் வாக்கு வங்கியில் ஏற்பட்ட பிளவு ஆகியவை அவருக்கு சவாலாக உள்ளது. இருப்பினும், நிதிஷ் குமாருக்கு அடுத்தபடியாக மக்களிடையே மிகுந்த வரவேற்பு பெற்றவர் தேஜஸ்வி யாதவ்தான்.

ராகுல் காந்தி:

1990 வரை பிஹாரில் ஆட்சியில் இருந்த காங்கிரஸ் அதன் பிறகு மாநிலத்தில் பெரும் தாக்கம் இழந்தது. 2020 தேர்தலில் வெறும் 19 இடங்களில் மட்டுமே வெற்றி பெற்றது. இந்த முறை பிஹாரில் மறுபடியும் எழுச்சி காண விரும்புகிறார் ராகுல் காந்தி. இதற்காக “வாக்காளர் அதிகார யாத்திரை”யை தேஜஸ்வியுடன் இணைந்து நடத்தினார். மேலும், வாக்காளர் பட்டியல் குறித்த அவரது குற்றச்சாட்டுகள் தற்போது விவாதமாகியுள்ளது.

பிரசாந்த் கிஷோர்:

முன்னாள் தேர்தல் வியூகவாதியாக இருந்த இவர், தற்போது ஜன் சுராஜ் கட்சியை நிறுவி அரசியலில் தன்னை நிலைநிறுத்த முயற்சிக்கிறார். கடந்த இரண்டு ஆண்டுகளாக பிஹாரை முழுவதும் சுற்றி மக்களிடையே பிரபலமடைந்துள்ளார். பாஜக, ஜேடியு, ஆர்ஜேடி மற்றும் காங்கிரஸை கடுமையாக விமர்சித்து வருகிறார். இவர் எத்தனை இடங்களில் வெற்றி பெறுவார் என்பதைக் காட்டிலும், எந்தக் கட்சியின் வாக்குகளை பிரிக்கப் போகிறார் என்பதுதான் அரசியல் வட்டாரங்களில் பேசப்படுகிறது.

அசாதுதீன் ஓவைசி:

2020 பிஹார் தேர்தலில் எதிர்பாராத வகையில் ஐந்து இடங்களில் வெற்றி பெற்று சீமாஞ்சல் பகுதியில் தாக்கத்தை ஏற்படுத்தியவர் ஏஐஎம்ஐஎம் தலைவர் அசாதுதீன் ஓவைசி. இம்முறையும் தனித்து போட்டியிடுகிறார். இதனால் சிறுபான்மை வாக்குகள் பிளவுபடும் அபாயம் இருக்கிறது; இது ஆர்ஜேடி மற்றும் காங்கிரஸுக்கு சவாலாக அமையக்கூடும். கடந்த முறை அவரது கட்சி சார்ந்த நான்கு எம்எல்ஏக்கள் பின்னர் ஆர்ஜேடிக்கு இணைந்தனர் என்பதும் குறிப்பிடத்தக்கது.