உத்தரபிரதேசத்தில், கன்வார் யாத்ரா வழித்தடத்தில் உள்ள உணவகங்களின் பெயர் பலகைகளில் உரிமையாளர்களின் பெயர்கள் மற்றும் தொலைபேசி எண்கள் கட்டாயம் இடம்பெற வேண்டும் என அம்மாநில அரசு உத்தரவிட்டுள்ளது. இதற்கான பின்னணி என்ன? அதைப் பற்றி பார்ப்போம்.
கன்வர் என்றால் இளவரசன் மற்றும் காவடி. வட மாநிலங்களில், சிவனின் ஆசீர்வாதத்தைப் பெறுவதற்காக ஒவ்வொரு ஆண்டும் சிவ பக்தர்கள் கன்வர் யாத்திரை மேற்கொள்கின்றனர்.
ராவணன் முதல் கன்வர் யாத்திரையைத் தொடங்கினான் என்று புராணக்கதை கூறுகிறது. ராவணன் காவடி ஏந்தி அதில் கங்கை நீர் கொண்டு வந்து சிவலிங்கத்திற்கு அபிஷேகம் செய்து வழிபட்டதாகவும், இந்த கண்வர் யாத்திரை இன்றும் நடந்து வருவதாகவும் கூறப்படுகிறது.
கன்வர் யாத்திரையின் போது சிவ பக்தர்கள் மூங்கில் காவடியை இரு தோள்களிலும் சுமந்து செல்கின்றனர். காவடியின் இரு முனைகளிலும் இரண்டு வண்ணமயமான மண் பானைகள் இணைக்கப்பட்டுள்ளன.
கன்வர் யாத்ரா என்பது ஒரு மாத விழாவாகும். சிவ பக்தர்கள், காவி உடை மற்றும் வெறுங்காலுடன், புனித ஸ்தலங்களில் இருந்து கங்கை நீரை சேகரிக்கின்றனர்.
அதன்பிறகு, சொந்த ஊருக்குச் சென்று அங்குள்ள சிவலிங்கத்திற்கு கங்கை நீரால் “அபிஷேகம்” செய்து வழிபடுகிறார்கள். வாழ்க்கையில் நடக்கும் அனைத்திற்கும் நன்றி தெரிவிக்கும் விதமாக இந்த யாத்திரை கருதப்படுகிறது.
கன்வர் யாத்திரையின் போது, காவடியில் உள்ள மண் பானைகள் தரையில் விழாமல் பார்த்துக் கொள்வது மிகவும் முக்கியமானதாக கருதப்படுகிறது.
இந்த ஆண்டு கன்வர் யாத்திரை 22ஆம் தேதி தொடங்கி ஆகஸ்ட் 2ஆம் தேதி சிவராத்திரி அன்று நிறைவடைகிறது.
இந்நிலையில், உத்தரபிரதேசத்தில் உள்ள கன்வார் யாத்ரா வழித்தடத்தில் உள்ள உணவகங்களின் பெயர் பலகைகளில் உரிமையாளரின் பெயர் மற்றும் தொலைபேசி எண்களை கண்டிப்பாக வைக்க வேண்டும் என அம்மாநில அரசு உத்தரவிட்டுள்ளது. மேலும், ஓட்டல்கள், கடைகளில் பணிபுரியும் ஊழியர்களின் பெயர்களை எழுதி வைக்க உத்தரவு பிறப்பிக்கப்பட்டது.
கடை உரிமையாளர்கள் தங்கள் பெயரை கடை பெயர் பலகையில் எழுத வேண்டும் என்ற சட்டம் முசாபர்நகரில் மட்டும் அமலுக்கு வந்தது. கன்வார் யாத்திரை தொடர்பான அரசின் உத்தரவு பெரும் சர்ச்சையை உருவாக்கியுள்ளது.
வாடிக்கையாளர்கள் யாருடைய வியாபாரத்தை வாங்குகிறார்கள் என்பதை அறிந்து கொள்ள வேண்டும் என்பதற்காகவும், குழப்பம் ஏற்படக்கூடாது என்பதற்காகவும் இந்த அவசரச் சட்டம் கொண்டு வரப்பட்டுள்ளதாக உத்தரபிரதேச மாநில அரசு தெரிவித்திருந்தது.
இந்நிலையில், இந்த சட்டத்தை மாநிலம் முழுவதும் அமல்படுத்த முதல்வர் யோகி ஆதித்யநாத் அரசு உத்தரவு பிறப்பித்துள்ளது. மேலும், கன்வார் யாத்ரா வழித்தடங்களில் ஹலால் சான்றளிக்கப்பட்ட உணவுப் பொருட்களை விற்பனை செய்வது தடைசெய்யப்பட்டுள்ளது.
கடுமையான உணவு விதிகளை கடைபிடிக்கும் சிவ பக்தர்களின் மத உணர்வுகளை மதித்து பாதுகாக்க உத்தரபிரதேச அரசு எடுத்த குறிப்பிடத்தக்க நடவடிக்கை இது.
மாவட்ட அளவிலான உத்தரவாக ஆரம்பித்தது மாநில அளவிலான ஆணையாக மாறியது. மேலும் இது பாஜக ஆளும் உத்தரகாண்டின் எல்லைக்கு அப்பால் உள்ளது.
இப்போது ஹரித்வார் மற்றும் கன்வார் யாத்ரா வழித்தடங்களில் உள்ள உணவகங்களின் உரிமையாளர்களும் தங்கள் பெயர்களை கடைப் பலகைகளில் வைக்க உத்தரவிடப்பட்டுள்ளது.
யாரையும் குறிவைத்து இந்த முடிவு எடுக்கப்படவில்லை என்றும், சிலர் தங்களுடைய அடையாளத்தை மறைத்து உணவகங்களை நடத்துவதால் மோதல்கள் ஏற்படுவதாகவும், அதைத் தடுக்கவே இந்த முடிவு எடுக்கப்பட்டுள்ளதாகவும் உத்தரகாண்ட் முதல்வர் புஷ்கர் சிங் தாமி தெரிவித்துள்ளார்.
யோகி ஆதித்யநாத் அரசின் இந்த முடிவை அகில இந்திய முஸ்லிம் ஜமாத் தேசியத் தலைவர் மௌலானா ஷஹாபுதீன் ரஸ்வி வரவேற்றுள்ளார். மேலும், கன்வர் யாத்திரை ஒரு மதப் பயணம் என்றும், அதை அரசியலாக்கக் கூடாது என்றும், இந்துக்களுக்கும் முஸ்லிம்களுக்கும் இடையிலான மோதலைத் தடுக்கும் நோக்கில் இந்த உத்தரவு பிறப்பிக்கப்பட்டுள்ளதாகவும் அவர் கூறினார்.
உத்தரபிரதேச அரசு எடுத்த இந்த நல்ல முடிவுக்கு ஹரியானா முதல்வர் நயாப் சிங் சைனி பாராட்டு தெரிவித்துள்ளார்.
ஜாதி மற்றும் மதத்தின் அடிப்படையில் சமூகத்தில் பிளவை ஏற்படுத்துவது அரசியலமைப்பு சட்டத்திற்கு எதிரான குற்றம் என்று யோகி அரசின் இந்த முடிவை காங்கிரஸ் பொதுச் செயலாளர் பிரியங்கா காந்தி விமர்சித்துள்ளார். இந்த உத்தரவை உடனடியாக திரும்பப் பெற வேண்டும் என்றும் அவர் கோரிக்கை விடுத்துள்ளார்.
மத்திய அமைச்சரும், லோக் ஜன சக்தி கட்சியின் தலைவருமான சிராக் பாஸ்வான், சாதியின் பெயரால் எந்த பிரிவினையையும் ஆதரிக்க முடியாது என்று கூறியுள்ளார்.
உத்தரபிரதேச அரசின் இந்த உத்தரவு சமூக குற்றம் என சமாஜ்வாதி கட்சி தலைவர் அகிலேஷ் யாதவ் விமர்சித்துள்ளார்.
கன்வர் யாத்திரை தொடர்பான சர்ச்சைகளுக்கு மத்தியில், உத்தரபிரதேச முதல்வர் யோகி ஆதித்ய நாத் கன்வர் யாத்திரைக்கான வழித்தடங்களை ஆய்வு செய்து பக்தர்களுக்கான வசதிகள் மற்றும் மருத்துவ சேவைகள் குறித்து அதிகாரிகளுக்கு தேவையான உத்தரவுகளை பிறப்பிப்பதில் மும்முரமாக ஈடுபட்டுள்ளார்.
