பஞ்சாப்-ஹரியானா எல்லையில் போராட்டம் நடத்தி வரும் விவசாயிகளுடன் மத்திய அமைச்சர்கள் நேற்று பேச்சுவார்த்தை நடத்தினர்.
பயிர்களுக்கு குறைந்தபட்ச ஆதரவு விலைக்கான சட்டப்பூர்வ உத்தரவாதம் உள்ளிட்ட பல்வேறு கோரிக்கைகளுக்காக போராட்டம் நடத்தி வரும் விவசாயிகளுக்கும் மத்திய அரசுக்கும் இடையே நேற்று (பிப்ரவரி 22) சண்டிகரில் பேச்சுவார்த்தை நடைபெற்றது.
சண்டிகரில் உள்ள மகாத்மா காந்தி பொது நிர்வாக நிறுவனத்தில் நடைபெற்ற பேச்சுவார்த்தையில் மத்திய அரசு சார்பாக மத்திய அமைச்சர்கள் சிவராஜ் சிங் சவுகான், பியூஷ் கோயல் மற்றும் பிரஹ்லாத் ஜோஷி ஆகியோர் பங்கேற்றனர். மாநில அமைச்சர்கள் ஹர்பால் சிங் சீமா மற்றும் குர்மீத் சிங் குடின் மற்றும் பஞ்சாப் அரசின் பிற பிரதிநிதிகள் பங்கேற்றனர், விவசாயிகளின் பிரதிநிதிகள் ஜக்ஜித் சிங் தலேவால் மற்றும் சர்வான் சிங் பந்தர் ஆகியோர் பங்கேற்றனர்.
பேச்சுவார்த்தைக்குப் பிறகு செய்தியாளர்களிடம் பேசிய சிவராஜ் சிங் சவுகான், “விவசாயிகளுடன் நாங்கள் நல்ல கலந்துரையாடலை நடத்தினோம். அடுத்த சுற்று பேச்சுவார்த்தை மார்ச் 19 அன்று சண்டிகரில் நடைபெறும்” என்றார்.
இதற்கிடையில், மத்திய அமைச்சர்களுடனான பேச்சுவார்த்தை முடிவடையாததால் விவசாயிகளின் போராட்டங்கள் தொடர்கின்றன.
பயிர்களுக்கு குறைந்தபட்ச ஆதரவு விலைகள், விவசாயிகளின் கடன்களை தள்ளுபடி செய்தல், விவசாயிகள் மற்றும் விவசாயத் தொழிலாளர்களுக்கான ஓய்வூதியம், மின்சாரக் கட்டண உயர்வு கூடாது, காவல் வழக்குகளைத் திரும்பப் பெறுதல் மற்றும் 2021 லக்கிம்பூர் காரி வன்முறையில் பாதிக்கப்பட்டவர்களுக்கு நீதி வழங்குதல் போன்ற சட்டப்பூர்வ உத்தரவாதங்களை விவசாய சங்கப் பிரதிநிதிகள் முன்னர் வலியுறுத்தி வந்தனர் என்பது குறிப்பிடத்தக்கது.
