குஜராத் முன்னாள் முதல்வர் விஜய் ரூபானியின் மரணத்தில் பிரதமர் மோடி ஆழ்ந்த இரங்கல் தெரிவித்தார்
நேற்று (ஜூன் 12) மதிய நேரத்தில் அகமதாபாத் அருகே ஏற்பட்ட விமான விபத்தில், பயணித்த 242 பேரில் 241 பேர் உயிரிழந்துள்ளனர். இந்த பயணிகளின் பட்டியலில் குஜராத் மாநிலத்தின் முன்னாள் முதல்வர் விஜய் ரூபானியின் பெயரும் இருந்தது. அவருடைய மரணம், குஜராத் அரசியலமைப்பில் பெரும் சோகத்தை ஏற்படுத்தியுள்ளது.
இந்நிலையில், இன்று காலை அகமதாபாத்திற்கு சென்ற பிரதமர் நரேந்திர மோடி, விபத்து நடந்த இடத்தை நேரில் பார்வையிட்டார். தொடர்ந்து மருத்துவமனைக்கு சென்று காயமடைந்தவர்களின் நிலையை நேரில் பார்வையிட்டு நலம் விசாரித்தார்.
பின்னர், விபத்தில் உயிரிழந்த விஜய் ரூபானியின் குடும்பத்தை சந்தித்த பிரதமர் மோடி, அவர்களுக்கு ஆறுதல் கூறினார். அவர் வெளியிட்ட ‘எக்ஸ்’ (முன்னாள் ட்விட்டர்) பதிவில், “விஜய் ரூபானியின் மரணம் நம்ப முடியாத ஒரு துயரச் செய்தி. நான் அவரை பல வருடங்களாக அறிந்துள்ளேன். பல சவாலான காலகட்டங்களில் நாங்கள் தோளோடு தோள் சேர்ந்து பணியாற்றியுள்ளோம்,” என கூறினார்.
மேலும் பிரதமர் கூறியதாவது:
“விஜய் ரூபானி மிகவும் பணிவானவர், கடுமையாக உழைத்தவர். கட்சியின் கொள்கைகளுக்கு அன்புடன் உறுதியுடன் நிலைத்தவர். அரசியலில் பல்வேறு பதவிகளை வகித்து, அவரது ஒவ்வொரு பங்களிப்பும் குறிப்பிடத்தக்கது. முதல்வராக இருந்த காலத்தில், குஜராத்தின் வளர்ச்சிக்கு பல முன்னேற்ற திட்டங்களை செயல்படுத்தினார். குறிப்பாக, பொதுமக்களின் வாழ்வை மேம்படுத்தும் முயற்சிகளில் அவர் அதிக கவனம் செலுத்தினார். அவரது நினைவுகள் என்றும் என்னுடனே இருக்கும். அவரது குடும்பத்தாருக்கும் நண்பர்களுக்கும் என் ஆழ்ந்த இரங்கலை தெரிவிக்கிறேன். ஓம் சாந்தி.”
