அகமதாபாத் ஏர் இந்தியா விமான விபத்து – பலி எண்ணிக்கை 270 ஆக உயர்வு
அகமதாபாதில் நிகழ்ந்த ஏர் இந்தியா விமான விபத்து தொடர்பாக, விமானத்தின் வால் பகுதியில் இருந்து மேலும் ஒரு உடல் மீட்கப்பட்டுள்ள தகவல் வெளியாகியுள்ளது. இதனுடன், உயிரிழந்தோர் எண்ணிக்கை 270 ஆக அதிகரித்துள்ளது.
பிஜி மருத்துவக் கல்லூரியின் இளநிலை மருத்துவர்கள் சங்கத் தலைவர் தவால் கமேட்டி இன்று (சனிக்கிழமை) செய்தியாளர்களிடம் கூறியதாவது: “தற்போதைய நிலவரப்படி, விபத்து நடைபெற்ற இடத்திலிருந்து மொத்தமாக 270 சடலங்கள் மீட்கப்பட்டுள்ளன” என்றார்.
விபத்து நடந்த பகுதியில் தடயங்கள் சேகரிக்கும் பணியில் தடயவியல் நிபுணர்கள் தீவிரமாக ஈடுபட்டுள்ளனர்.
குஜராத் மாநிலத்தின் அகமதாபாத்தில் ஜூன் 12 அன்று ஏர் இந்தியா விமானம் விபத்துக்குள்ளானது. இந்தச் சம்பவம் சர்வதேச அளவில் பெரும் அதிர்வலைகளை ஏற்படுத்தியது. 242 பயணிகளுள் 241 பேர் உயிரிழந்தனர்; ஒருவர் மட்டும் உயிர் தப்பியுள்ளார். அந்த விமானம், மருத்துவக் கல்லூரி விடுதி கட்டடத்தின் மீது விழுந்து வெடித்து தீப்பிடித்ததாக கூறப்படுகிறது.
இந்த பேரழிவில், விமானத்தில் இருந்தவர்கள் மட்டுமின்றி, மருத்துவ மாணவர்கள் மற்றும் கல்லூரி வளாகத்தில் இருந்தவர்களும் உயிரிழந்துள்ளனர். இதன் காரணமாக, மொத்த உயிரிழப்பு எண்ணிக்கை 270 ஆக உயர்ந்துள்ளது.
உயிரிழந்தவர்களின் உடல்களை அடையாளம் காணும் பணிகள் விரைவுபடுத்தப்பட்டுள்ளன. அவர்களின் உறவினர்களிடமிருந்து டிஎன்ஏ மாதிரிகள் சேகரிக்கப்படுகிறது. மீட்பு மற்றும் பாதுகாப்புப் பணிகளுக்காக NSG குழு சம்பவ இடத்தில் ஈடுபடுத்தப்பட்டுள்ளது.
விபத்து தொடர்பாக விமான விபத்து புலனாய்வுப் பணியகம் (AAIB), சிவில் விமானப் போக்குவரத்து இயக்குநரகம் (DGCA), அகமதாபாத் குற்றப்பிரிவு, உள்ளூர் காவல்துறை மற்றும் தேசிய புலனாய்வு அமைப்பின் (NIA) அதிகாரிகள் விசாரணை மேற்கொண்டு வருகின்றனர். வெள்ளிக்கிழமை, NIA அதிகாரிகளும் சம்பவ இடத்திற்கு நேரில் சென்று ஆய்வு செய்தனர்.
மீட்கப்பட்ட சடலங்களின் அடையாளம் காணும் பணிகள் விரைந்து நடைபெற்று வருகின்றன. அதிகாரிகள் தெரிவித்ததாவது, மீட்கப்பட்ட எச்சங்கள் மீது டிஎன்ஏ பரிசோதனைகள் சுருக்கமான காலத்திலேயே மேற்கொள்ளப்படும் என்றும், மூன்று நாட்களுக்குள் அடையாளம் காணும் பணிகள் முடிக்கப்படும் என்றும் தெரிவித்தனர்.
