ஈரான் மீது இஸ்ரேல் நடத்திய தாக்குதலுக்கான எதிர்வினையில் இந்திய அரசு தன்னுடைய பொறுப்பை உணர்ந்து செயல்பட வேண்டும் என காங்கிரஸின் முன்னாள் தலைவர் சோனியா காந்தி வலியுறுத்தியுள்ளார்.
இந்த கருத்தை, தி இந்து நாளிதழில் எழுதிய கட்டுரையின் மூலம் அவர் தெரிவித்துள்ளார். அதில், காசாவில் ஏற்பட்ட மனிதாபிமான பேரழிவும், தற்போது ஈரானுக்கு எதிராக இஸ்ரேல் மேற்கொண்ட தாக்குதலும் தொடர்பாக இந்திய அரசின் மௌனம், நம் நாட்டின் பாரம்பரியமான தார்மீக நிலைப்பாடுகளுக்கும், ராஜதந்திர நெறிமுறைகளுக்கும் முரணானதாகும் என்று அவர் கூறியுள்ளார். இது, நம் குரலை மட்டுமன்றி நம் மதிப்பீடுகளையும் இழக்கும் செயலில் இந்தியாவை ஈடுபடுத்துகிறது எனவும் அவர் கூறினார்.
மேலும், இஸ்ரேல்–பாலஸ்தீனக் கோளாறு தொடர்பாக, ‘இரு நாடு தீர்வு’ என்ற இந்தியாவின் நீண்டகால கொள்கை நிலைப்பாட்டை தற்போதைய மத்திய அரசு பின்பற்ற மறுத்துவிட்டது என்றும் சோனியா காந்தி குற்றம்சாட்டினார்.
இந்த சூழலில், இந்தியா தாமதிக்காமல் தனது நிலைப்பாட்டை வெளிப்படையாகவும் தெளிவாகவும் வெளியிட வேண்டும் என்றும் அவர் வலியுறுத்தினார். மேற்கு ஆசியாவில் அமைதி நிலவ அனைத்து தூதரக வழிமுறைகளையும் பயன்படுத்தி, பேச்சுவார்த்தைக்கு வழிவகை செய்யும் முயற்சியில் இந்தியா ஈடுபட வேண்டும் என்றும் அவர் அறிவுறுத்தினார்.
ஏற்கனவே, கடந்த ஏப்ரல் 13-ம் தேதி ஈரான் மீது இஸ்ரேல் நடத்திய ராணுவ தாக்குதல் உலகத்திற்கே ஆபத்தான விளைவுகளை ஏற்படுத்தும் செயலை மீண்டும் நினைவுபடுத்தியது என்றும், இது சர்வதேச சட்டத்திற்கும், பிராந்திய நிலைத்தன்மைக்கும் எதிரானது எனவும் அவர் குறிப்பிட்டுள்ளார். இந்த தாக்குதலையும், அதனால் ஈரானில் ஏற்பட்ட உயிர் இழப்புகளையும் காங்கிரஸ் கட்சி கடுமையாக கண்டிப்பதாகவும் அவர் தெரிவித்தார்.
காசாவில் நடைபெற்ற மிருகத்தனமான தாக்குதல்களின் தொடர்ச்சியாக ஈரான் மீது நடத்திய இந்த தாக்குதலும், பொதுமக்களின் உயிர் பாதுகாப்பை மற்றும் பிராந்திய அமைதியை முற்றிலும் புறக்கணிக்கும் செயல் என அவர் கடுமையாக விமர்சித்தார்.
இஸ்ரேலின் தற்போதைய அரசு அமைதிக்கே அச்சுறுத்தலாகவும், தீவிரவாதத்தை ஊக்குவிக்கும் செயல்களிலும் தொடர்ந்து ஈடுபட்ட வரலாற்றைக் கொண்டுள்ளது என்றும் அவர் குறித்துள்ளார்.
ஈரான் அணு ஆயுதங்களை உருவாக்குகிறது என அமெரிக்க முன்னாள் அதிபர் ட்ரம்ப் கூறியதையும், அது தெளிவில்லாத, பொருத்தமற்ற குற்றச்சாட்டாகவும், ஏமாற்றமளிப்பதாகவும் சோனியா காந்தி தெரிவித்துள்ளார்.
அதே நேரத்தில், இந்தியாவுக்கு ஈரான் வழங்கிய ஆதரவையும் அவர் நினைவூட்டுகிறார். 1994-ம் ஆண்டு, ஐ.நா. மனித உரிமைகள் ஆணையத்தில் காஷ்மீர் விவகாரத்தில் இந்தியாவை எதிர்க்கும் தீர்மானத்தை தடுக்க ஈரான் உதவியது, மேலும் 1965 மற்றும் 1971 போர்களின் போது பாகிஸ்தானுக்கு ஆதரவளித்த ஈரானுடன் ஒப்பிடுகையில், தற்போதைய ஈரான் இஸ்லாமிய குடியரசு இந்தியாவுடன் நெருக்கமான உறவை பேணியுள்ளது எனவும் அவர் விளக்குகிறார்.
இந்தியா மற்றும் இஸ்ரேல் இடையிலான உறவு, பிராந்திய அமைதி மற்றும் சர்வதேச உறவுகளில் நம் நாட்டு நலன்களையும் பிரதிபலிக்கும், ஒரு முக்கியத்துவம் வாய்ந்தது. ஏனெனில், மேற்கு ஆசியா முழுவதும் லட்சக்கணக்கான இந்தியர்கள் வேலை செய்து வருகின்றனர், எனவே அப்பிராந்தியத்தில் அமைதி நிலவுவது நமது தேசிய நலன்களுக்கே சார்ந்த ஒரு விஷயமாகும் என்பதையும் அவர் வலியுறுத்தியுள்ளார்.
