ஒடிசா மாநிலத்தில், தனது பாலியல் புகாரில் எந்த நடவடிக்கையும் எடுக்கப்படாததையடுத்து தற்கொலைக்கு முயன்ற 20 வயது பெண் மாணவி, ஜூலை 14 இரவு சிகிச்சை பலனின்றி உயிரிழந்தார்.
பாலசோர் மாவட்டத்தில் இயங்கும் ஒரு கல்வி நிறுவனத்தில் பி.எட். படித்து வந்த அந்த மாணவியை, அக்கல்லூரியின் கல்வியியல் துறைத் தலைவர் சமிரா குமார் சாகு தொடர்ந்து பாலியல் தொல்லை கொடுத்து வந்ததாக கூறப்படுகிறது. இதுகுறித்து, கல்லூரி புகார் தீர்வுக் குழுவிடம் மாணவி முறையிட்டிருந்தார்.
ஆனால், அவரது புகாரில் எந்தவித நடவடிக்கையும் எடுக்கப்படவில்லை. இதனை தொடர்ந்து கடந்த சனிக்கிழமை, கல்லூரி முதல்வரை நேரில் சந்தித்து பேசினார். அதன் பின்னர், மாணவி கல்லூரி வளாகத்திலேயே தன்னைத்தானே தீ வைத்து கொண்டார்.
தீக்காயங்களுடன் வைத்தியசாலைக்கு எடுத்துச் செல்லப்பட்ட அவர், 90 சதவீத காயங்களுடன் ஏம்ஸ் – புவனேஸ்வர் மருத்துவமனையில் அனுமதிக்கப்பட்டார். தீவிர சிகிச்சை பிரிவில் அவர் உயிர் போராடிய நிலையில், திங்கட்கிழமை இரவு 11.46 மணிக்கு அவர் இறந்ததாக மருத்துவமனை நிர்வாகம் உறுதி செய்துள்ளது.
முதலில் அவர் ஜூலை 12-ஆம் தேதி, பாலசோர் மாவட்ட மருத்துவமனையில் சிகிச்சை பெற்றுக் கொண்டிருந்த நிலையில், மேல் சிகிச்சைக்காக புவனேஸ்வருக்கு மாற்றப்பட்டார். மருத்துவமனை தரப்பில், “அவசர சிகிச்சை வழங்கிய போதும் உயிரைக் காப்பாற்ற முடியவில்லை,” என தெரிவிக்கப்பட்டுள்ளது.
இந்த நிகழ்வுக்கு எதிரொலியாக, ஒடிசா மாநில முதல்வர் மோகன் சரண் மாஜி, மாணவியின் மரணத்திற்கு ஆழ்ந்த இரங்கலைத் தெரிவித்தார். மேலும், “பாதிப்புக்கு காரணமானவர்களுக்கு எதிராக சட்டப்படி கடுமையான நடவடிக்கை எடுக்கப்படும். மாணவியின் குடும்பத்திற்கு முழுமையான ஆதரவையும், நியாயம் கிடைக்க அரசு உறுதி அளிக்கிறது,” என்றார்.
சமிரா குமார் சாகு, மாணவிக்கு தொடர்ச்சியாக மனதளவிலும், செயல்களிலும் தொல்லை அளித்துள்ளதாக, அவரது சகப் படிப்பாளர்கள் உறுதியாக தெரிவித்துள்ளார். மாணவி இதுகுறித்து கல்லூரி நிர்வாகத்துடனும், முதல்வருடனும், காவல்துறையுடனும் தொடர்பு கொண்டு புகார் அளித்திருந்ததுடன், அதில் எந்த நடவடிக்கையும் எடுக்கப்படவில்லை என்பதும் குறிப்பிடத்தக்கது.
தீக்குளித்த சம்பவத்தை அடுத்து, கல்லூரி முதல்வர் திலீப் குமார் கோஷ் கைது செய்யப்பட்டு, 14 நாட்கள் நீதிமன்ற காவலில் அடைக்கப்பட்டுள்ளார்.
இந்த விவகாரம் ஒடிசா அரசியல் கோளாறுக்குத் தள்ளியுள்ளது. மாணவியின் உயிரிழப்பு, பெண்கள் பாதுகாப்பை உறுதி செய்ய தவறியதற்கான ஒரு வெளிப்படையான எடுத்துக்காட்டாக இருக்கின்றதென்று எதிர்க்கட்சிகள் ஆளும் பாஜக அரசை கடுமையாக விமர்சித்துள்ளன. இதனால், மாநில அரசின் மீது அரசியல் அழுத்தம் அதிகரித்துள்ளது.
