நிமிஷா பிரியாவை மீட்க அடுத்தகட்ட நடவடிக்கைகள் – வெளியுறவுத் துறை விளக்கம்
ஏமன் நாட்டில் மரண தண்டனைக்காக எதிர்நோக்கியுள்ள கேரள நர்ஸ் நிமிஷா பிரியா தொடர்பான விவகாரத்தில் தீர்வை காண இந்தியா பலபடிகளில் முயற்சி செய்து வருகிறது என வெளியுறவுத் துறையின் பேச்சாளர் ரன்தீர் ஜெய்ஸ்வால் தெரிவித்துள்ளார்.
டெல்லியில் இன்று (வியாழக்கிழமை) நடைபெற்ற பத்திரிகையாளர் சந்திப்பில் அவர் கூறியதாவது:
“இது மிக மிக நுட்பமான மற்றும் உணர்வுப்பூர்வமான ஒரு விவகாரமாகும். இந்திய அரசு இதனை மிகுந்த கவனத்துடனும் பொறுப்புடன் அணுகி வருகிறது. நிமிஷா பிரியாவின் குடும்பத்துக்கு சட்ட உதவிகளை வழங்குவதோடு, அவர்களுக்காக தனிப்பட்ட வழக்கறிஞர் ஒருவரும் நியமிக்கப்பட்டுள்ளார். ஏமனில் உள்ள உள்ளூர்வாசிகளுடன் பேச்சுவார்த்தை நடத்தியும் தீர்வு தேடப்பட்டு வருகிறது.”
மேலும், “நிமிஷா பிரியாவின் குடும்பத்தினருக்கும், கொல்லப்பட்ட தலால் அப்துல்லா மெஹ்தியின் குடும்பத்தினருக்கும் இடையே பேச்சுவார்த்தை நடைபெறும் வகையில் கால அவகாசம் பெறவே, நாம் பல நட்பு நாடுகளுடன் பேச்சுவார்த்தையில் ஈடுபட்டு வருகிறோம். இதன் ஒரு பகுதியாகவே ஏமன் அரசு, மரண தண்டனையை தற்காலிகமாக நிறுத்தியது” என்றும் அவர் கூறினார்.
மதத் தலைவர் தொடர்பான கேள்விக்கு விளக்கம் இல்லை
அப்போது, “கேரள மாநில முஸ்லிம் மத தலைவர் கிராண்ட் முப்தி ஏ.பி. அபூபக்கர் முஸ்லியார், ஏமன் நாட்டைச் சேர்ந்த மதத் தலைவர்களை தொடர்பு கொண்டு பேசியதால்தான் மரண தண்டனை தள்ளி வைக்கப்பட்டது” என்ற தகவலைப் பற்றி அவரிடம் கேட்டபோது, “இது குறித்து எங்களுக்கு எந்தத் தகவலும் இல்லை” என ஜெய்ஸ்வால் பதிலளித்தார்.
‘சேவ் நிமிஷா பிரியா’ கவுன்சிலின் வேண்டுகோள்
நிமிஷா பிரியாவை மீட்பதற்காக “சேவ் நிமிஷா பிரியா கவுன்சில்” என்ற குழு உருவாகி செயல்பட்டு வருகிறது. இந்த குழுவில் நிமிஷாவின் தாயார் பிரேமா குமாரி, ஏமனில் வசிக்கும் இந்தியர் சாமுவேல் ஜெரோம் பாஸ்கரன் ஆகியோர் பங்கு பெறுகின்றனர். இவர்களின் முயற்சியால் குருதிப் பணமாக வழங்க வேண்டிய தொகையும் திரட்டப்பட்டு வருகிறது.
இந்த குழு இன்று (வியாழக்கிழமை) வெளியிட்டுள்ள அறிக்கையில், “நிமிஷா பிரியா தொடர்பாக சமூக ஊடகங்களில் கட்டுப்பாடற்ற விவாதங்கள் அதிகரித்து வருவது, பேச்சுவார்த்தைகளில் தடையை உருவாக்கும் நிலை உருவாக்கியுள்ளது. எனவே, ஊடகங்கள் மற்றும் பொது மக்கள் இப்பெயரால் பரவும் தவறான செய்திகளைத் தவிர்க்க வேண்டும்” எனக்கூறப்பட்டுள்ளது.
அறிக்கையில் மேலும் தெரிவிக்கப்பட்டுள்ளதாவது:
“ஏமன் நாட்டைச் சேர்ந்த மதத் தலைவர் ஷேக் உமர் ஹபீப், மெஹ்தி குடும்பத்தினருடன் உரையாட உதவி செய்து வருகிறார். ஆனால், சமூக ஊடகங்களில் அவரைத் தொடர்புடைய நபர்கள் பற்றிய தவறான தகவல்கள் பரவுவதால், மெஹ்தி குடும்பத்தில் மூத்தவர்கள் பேச்சுவார்த்தையில் ஈடுபடுவதற்கு இடையூறு ஏற்படுகிறது. இளைய தலைமுறையினர், இத்தகைய செய்திகளால் பாதிக்கப்பட்டு பேச்சுவார்த்தையை முன்னெடுக்க எதிர்ப்பு தெரிவிக்கின்றனர். எனவே, அனைவரும் அமைதி காக்க வேண்டும்” என குறிப்பிடப்பட்டுள்ளது.
மெஹ்தி குடும்பம் வலியுறுத்தும் நிலை
முன்னதாக 2017-ல், ஏமனில் தலால் அப்துல்லா மெஹ்தியை கொலை செய்த குற்றச்சாட்டில், நிமிஷா பிரியாவுக்கு மரண தண்டனை வழங்கப்பட்டது. ஜூலை 16ஆம் தேதி அந்த தண்டனை நிறைவேற்றப்பட இருந்த நிலையில், இருநாட்கள் முன் தற்காலிகமாக நிறுத்தப்பட்டது.
இந்த சூழ்நிலையில், தலால் மெஹ்தியின் சகோதரர் அப்துல் ஃபத்தா மெஹ்தி, “எங்கள் சகோதரரைக் கொன்ற நிமிஷா பிரியாவுக்கு மன்னிப்பு வழங்க முடியாது. அவர் குற்றவாளி என்பதை மறைக்க முடியாது. இந்திய ஊடகங்கள் நிமிஷாவை போலிக் பாதிக்கப்பட்டவராக சித்தரிக்க முயற்சி செய்வது எங்கள் குடும்பத்துக்கு மிகுந்த வருத்தத்தை ஏற்படுத்தியுள்ளது. அதற்கான தண்டனை நிச்சயம் நடைமுறைக்கு வரவேண்டும்” என தனது மனநிலையை வெளிப்படுத்தியுள்ளார்.
