மகாதேவபுரா தொகுதியில் நடந்த ‘வாக்கு மோசடி’ ஒரு எடுத்துக்காட்டு மட்டுமே: பெங்களூரு பேரணியில் ராகுல் காந்தி உரை
மத்திய பெங்களூரு மக்களவைத் தொகுதிக்குள் அடங்கும் மகாதேவபுரா சட்டமன்றத் தொகுதியில் நிகழ்ந்ததாக கூறப்படும் வாக்கு மோசடி தொடர்பாக விரிவாக விசாரித்து, தொடர்புடைய தேர்தல் அதிகாரிகளுக்கு எதிராக கடுமையான நடவடிக்கை எடுக்க வேண்டும் என கர்நாடக அரசிடம், மக்களவை எதிர்க்கட்சித் தலைவர் ராகுல் காந்தி வலியுறுத்தினார்.
2024ஆம் ஆண்டு மக்களவைத் தேர்தலில் நடைபெற்றதாக கூறப்படும் வாக்கு மோசடியை எதிர்த்து, பெங்களூருவில் உள்ள ஃப்ரீடம் பார்க்கில் இன்று காங்கிரஸ் கட்சி பேரணி நடத்தியது. இதில் கட்சி தொண்டர்களிடம் உரையாற்றிய ராகுல் காந்தி கூறியதாவது:
“2024 மக்களவைத் தேர்தலில் மத்திய பெங்களூரு தொகுதியில் பாஜகவின் வெற்றியை உறுதி செய்யும் நோக்கில் மகாதேவபுரா பகுதியில் 1,00,250 போலி வாக்குகள் உருவாக்கப்பட்டன.
இந்திய தேர்தல் ஆணையம், பாஜகவுடன் சேர்ந்து நாடு முழுவதும் வாக்கு திருட்டில் ஈடுபட்டுள்ளது. கடந்த 10 ஆண்டுகளில் நடந்த தேர்தல்களில், வாக்குச்சாவடிகளில் பதிவான மின்னணு வாக்காளர் விவரங்கள் மற்றும் வீடியோக் காட்சிகளை தேர்தல் ஆணையம் உடனடியாக வெளியிட வேண்டும். இது செய்யப்படவில்லை என்றால், தேர்தல் ஆணையம் குற்றச் செயல்களில் ஈடுபட்டுள்ளதாகவே அது கருதப்படும்.
பொதுமக்களின் புகைப்படங்களுடன் கூடிய வாக்காளர் பட்டியலை ஆய்வு செய்தபோது, லட்சக்கணக்கான போலியான முகவரிகள், செல்லாத புகைப்படங்கள் மற்றும் தவறான விவரங்களுடன் செய்யப்பட்ட பதிவு முயற்சிகள் கண்டறியப்பட்டுள்ளன. ஒரே முகவரியில் பலர் வாக்காளர்களாகப் பதிவு செய்யப்பட்டிருந்தனர். மேலும், புதிய வாக்காளர்களை சேர்க்கும் படிவம் 6-ஐ தவறாக பயன்படுத்தியதும் தெரியவந்துள்ளது.
இந்நிலையில், தேர்தல் ஆணையம் பாஜகவுக்காகச் செயல்படாமல், அரசியலமைப்பை பாதுகாக்கும் நோக்கில் செயல்பட வேண்டும். மக்கள் உரிமைகளை பாதுகாப்பதுதான் தேர்தல் ஆணையத்தின் பிரதான பொறுப்பு.
மகாதேவபுரா தொகுதியில் நடந்த வாக்கு மோசடி ஒரு எடுத்துக்காட்டு மட்டுமே. இந்த மாதிரியான நடவடிக்கைகளின்மூலமே பிரதமர் நரேந்திர மோடிக்கு தேவையான 25 மக்களவை இடங்களை பாஜக கைப்பற்ற முடிந்தது. இந்த தொகுதிகளில் பெரும்பாலானவை சுமார் 34,000 வாக்குகள் மட்டுமே வித்தியாசத்துடன் வெற்றிபெற்றதாகும்.
நாங்கள் வாக்காளர்களின் உண்மையான விவரங்களை ஆவணமாக வைத்திருக்கிறோம். தேர்தல் ஆணையம் மின்னணு பதிவுகளை வெளியிடவில்லை என்றால், இந்த மோசடிகள் ஒரே கர்நாடகத்திற்கும் அல்லாமல், நாடு முழுவதும் நிகழ்ந்துள்ளன என்பது தெளிவாகும். எனவே, எங்கள் ஆய்வும், அரசியலிலும் இதற்கான பிரச்சாரமும் தொடரப்படும்.
ஆதாரங்களை மறைத்துவைக்க முடியாது. இதற்காக கடுமையான எதிர்ப்பு எதிர்கொள்ள நேரிடும். கர்நாடக மக்களுக்கு எதிராக நடந்த இந்த தேர்தல் மோசடியை அரசு விசாரித்து, பங்களித்த தேர்தல் அதிகாரிகள் மீது உரிய நடவடிக்கை எடுக்க வேண்டும். மகாதேவபுரா சம்பவத்தின் உண்மை வெளிப்பட வேண்டியது அவசியம்,” என்று அவர் வலியுறுத்தினார்.
