அரசியல் லாபத்திற்காக தேர்தல் ஆணையம் குறிவைக்கப்படுகிறது: தலைமை தேர்தல் ஆணையர்

தேர்தல் ஆணையம் அரசியல் நோக்கங்களுக்காக குறிவைக்கப்படுவதாக தலைமை தேர்தல் ஆணையர் ஞானேஷ் குமார் குற்றம் சாட்டியுள்ளார்.

பிஹாரில் வாக்காளர் பட்டியல் திருத்தம் மற்றும் வாக்கு முறைகேடு குறித்த குற்றச்சாட்டுகளை முன்வைத்து காங்கிரஸ் உட்பட எதிர்க்கட்சிகள் போராட்டம் நடத்தி வருகின்றன. இதையடுத்து, ராகுல் காந்தி இன்று முதல் 16 நாள் “வாக்காளர் அதிகார நடைபயணம்” பிஹாரில் தொடங்கியுள்ளார்.

இந்நிலையில், புதுடில்லியில் தேர்தல் ஆணையர்கள் சுக்பீர் சிங் சந்து, விவேக் ஜோஷி ஆகியோருடன் பத்திரிகையாளர் சந்திப்பு நடத்திய தலைமை தேர்தல் ஆணையர் ஞானேஷ் குமார் கூறியதாவது:

“வாக்காளர்களை குறிவைக்கும் ஒரு அரசியல் ஆயுதமாக தேர்தல் ஆணையத்தைப் பயன்படுத்தும் முயற்சிகள் நடைபெற்று வருகின்றன. ஆனால், தேர்தல் ஆணையம் தனது கடமைக்கும் வாக்காளர்களுடனும் உறுதியாக நிற்கிறது. எங்களுக்கு ஆளும் கட்சியும் எதிர்க்கட்சிகளும் வேறுபாடின்றி ஒரே மாதிரியானவை.

தேர்தல் ஆணையம் தனது அரசியலமைப்பு பொறுப்புகளை ஒருபோதும் புறக்கணிக்காது. வாக்கு திருட்டு போன்ற சொற்களைப் பயன்படுத்துவது, அரசியலமைப்பை அவமதிப்பதற்குச் சமம்.

அரசியல் கட்சிகளின் கோரிக்கையை அடிப்படையாகக் கொண்டு வாக்காளர் பட்டியலில் சிறப்பு திருத்தம் தொடங்கப்பட்டுள்ளது. வரைவு பட்டியலில் பிழைகள் இருந்தால் அதை ஒரு மாதத்தில் சுட்டிக்காட்டுமாறு கேட்டுள்ளோம். தேர்தல் ஆணையத்தின் கதவுகள் எல்லா தரப்பினருக்கும் எப்போதும் திறந்திருக்கும்.

வாக்காளர்கள், கட்சிகள், மற்றும் பூத்-லெவல் அலுவலர்கள் வெளிப்படையாக செயல்பட்டு வருகின்றனர். ஆனால் சில நேரங்களில் கட்சித் தலைமையை அடையாத தகவல்கள், அல்லது தவறான தகவல் பரப்பும் முயற்சிகள், உண்மைகளை மறைக்கும் நிலையை உருவாக்குகின்றன என்பது கவலைக்குரியது.

மின்னணு வாக்காளர் பட்டியல் குறித்து உச்ச நீதிமன்றம் 2019இல் தனியுரிமை பிரச்சினை எழுப்பியது. சமீபத்தில் பல வாக்காளர்களின் புகைப்படங்கள் அனுமதியின்றி ஊடகங்களில் வெளியிடப்பட்டன. தேர்தல் ஆணையம் வாக்காளர்களின் சிசிடிவி காட்சிகளை வெளியிட வேண்டுமா?

மக்களவைத் தேர்தலில் 1 கோடிக்கும் மேற்பட்ட அதிகாரிகள், 10 லட்சத்திற்கும் மேற்பட்ட பூத்-லெவல் முகவர்கள், 20 லட்சத்திற்கும் மேற்பட்ட வாக்குச்சாவடி பணியாளர்கள் பணியாற்றினர். இத்தனை வெளிப்படையான முறையிலும் இத்தனை பேர் முன்னிலையிலும் வாக்கு திருட்டு சாத்தியமா? இரட்டை வாக்கு குறித்த குற்றச்சாட்டுகள் வந்தபோது ஆதாரம் கேட்டோம், ஆனால் எதுவும் வழங்கப்படவில்லை.

இத்தகைய குற்றச்சாட்டுகள் எங்களை அல்லது வாக்காளர்களை அச்சுறுத்தாது. அரசியல் நோக்கங்களுக்காக தேர்தல் ஆணையத்தை குறிவைக்கும் முயற்சிகள் நடந்தாலும், அனைத்து வாக்காளர்களுடனும் நாங்கள் உறுதியாக நிற்கிறோம்” என்று அவர் வலியுறுத்தினார்.