இந்தியாவின் தனித்துவமான வான் பாதுகாப்பு அமைப்பு: எதிரி ஏவுகணைகளுக்கு சிம்ம சொப்பனம்!
இந்தியா முதல்முறையாக உள்நாட்டிலேயே தயாரிக்கப்பட்ட பல அடுக்கு வான் பாதுகாப்பு அமைப்பை வெற்றிகரமாகப் பரிசோதித்துள்ளது. இந்திய வான்வெளிக்குள் நுழையும் எதிரி ஏவுகணைகளை இடைமறித்து தாக்கும் திறன்கொண்ட இந்த அமைப்பு, இந்திய படைக்குக் கூடுதல் பலம் சேர்த்துள்ளது.
ஆப்ரேஷன் சிந்தூர் நடவடிக்கைக்கு பிறகு, இந்தியா தனது ராணுவ பலத்தை மேலும் அதிகரித்து வருகிறது. அண்மையில் மணிக்கு 29 ஆயிரம் கிலோமீட்டர் வேகத்தில், 5000 கிலோமீட்டர் தொலைவில் தாக்கும் அக்னி-5 ஏவுகணை சோதனை வெற்றிகரமாக நடைபெற்றது. அணு ஆயுதங்களைச் சுமந்து பாயும் அக்னி-5 ஏவுகணை பாகிஸ்தானை பதறவைத்தது.
இந்த நிலையில், முற்றிலும் உள்நாட்டிலேயே தயாரிக்கப்பட்ட Integrated Air Defence Weapon System எனப்படும் புதிய பல அடுக்கு வான் பாதுகாப்பு அமைப்பு ஒடிசா கடற்கரையில் வெற்றிகரமாகப் பரிசோதிக்கப்பட்டது. இந்தியாவின் முதல் வான் பாதுகாப்பு அமைப்பானது, குறுகிய நேரத்திற்குள் அதிவிரைவாக சென்று, எதிரி ஏவுகணைகள், உயர்சக்தி லேசர் ஆயுதங்கள் போன்றவற்றை தாக்கி அழிக்கவல்லது.
இந்த அமைப்பில் மூன்று விதமான ஆயுதங்கள் உள்ளன:
- Quick Reaction Surface to Air Missile (QRSAM)
- Very Short Range Air Defence System (VSHORAD)
- Directed Energy Weapon (DEW)
இதனால் எதிரியின் வான்வழி தாக்குதல்கள் முறியடிக்கப்படுவதோடு, முக்கிய பகுதிகள் பாதுகாக்கப்படுகின்றன.
ஒருங்கிணைந்த வான் பாதுகாப்பு அமைப்பின் வெற்றிக்காகப் பாடுபட்ட DRDO, இந்திய ஆயுதப் படைகள் மற்றும் தொழில்துறைக்கு மத்திய பாதுகாப்புத்துறை அமைச்சர் ராஜ்நாத்சிங் வாழ்த்து தெரிவித்துள்ளார். அவர் தனது சமூக வலைத்தள பக்கத்தில், இந்தச் சோதனை நமது நாட்டுக்குப் பல அடுக்கு வான் பாதுகாப்பு திறனை நிறுவியதாகவும், எதிரியின் வான்வழி அச்சுறுத்தல்களுக்கு எதிரான நமது பாதுகாப்பை மேலும் பலப்படுத்தியதாகவும் குறிப்பிட்டுள்ளார்.
ஆப்ரேஷன் சிந்தூர் நடவடிக்கையில் இந்திய வான் பாதுகாப்பு திறனை பலப்படுத்திய ஆகாஷ் ஏவுகணை அமைப்பு பாகிஸ்தான் ட்ரோன்களை துல்லியமாக தாக்கி அழித்தது. இந்நிலையில், சுயசார்பில் வடிவமைக்கப்பட்ட இந்த வான் பாதுகாப்பு அமைப்பு இந்திய பாதுகாப்பு துறையில் முக்கிய முன்னேற்றமாக பார்க்கப்படுகிறது மற்றும் பாகிஸ்தான், சீனாவுக்கு புதிய அச்சுறுத்தலையும் ஏற்படுத்தியுள்ளது.
