இந்தியாவின் வளர்ச்சிப் பயணத்தில் ஜப்பான் முக்கிய பங்காளி: பிரதமர் மோடி
இந்தியாவின் வளர்ச்சிப் பயணத்தில் ஜப்பான் எப்போதும் முக்கிய பங்காளியாக இருப்பதாக பிரதமர் நரேந்திர மோடி தெரிவித்துள்ளார்.
ஜப்பானுக்கு சென்ற பிரதமர் மோடி டோக்கியோவில் நடைபெற்ற இந்தியா-ஜப்பான் பொருளாதார மன்றத்தில் உரையாற்றினார். அவர் கூறியது:
“இந்தியாவின் வளர்ச்சிப் பயணத்தில் ஜப்பான் எப்போதும் முக்கிய பங்காளியாக இருந்து வருகிறது. மெட்ரோ ரயில்கள் முதல் உற்பத்தி துறைகள், குறைக்கடத்திகள் முதல் ஸ்டார்ட்அப் நிறுவனங்கள் வரை, ஒவ்வொரு துறையிலும் நமது கூட்டாண்மை பரஸ்பர நம்பிக்கையின் அடையாளமாக மாறியுள்ளது.
ஜப்பானிய நிறுவனங்கள் இந்தியாவில் 40 பில்லியன் டாலருக்கும் மேல் முதலீடு செய்துள்ளன. கடந்த 2 ஆண்டுகளில் மட்டும் 30 பில்லியன் டாலர் தனியார் முதலீடு செய்யப்பட்டுள்ளது. கடந்த 11 ஆண்டுகளில் இந்தியா அடைந்த மாற்றங்களை அனைவரும் அறிந்திருக்கிறீர்கள். இன்று, இந்தியாவில் அரசியல் மற்றும் பொருளாதார ஸ்திரத்தன்மை, கொள்கைகளில் வெளிப்படைத்தன்மை மற்றும் கணிக்கக்கூடிய தன்மை உள்ளது.
இந்தியா தற்போது உலகின் வேகமாக வளர்ந்து வரும் பெரிய பொருளாதாரமாக இருக்கிறது, மேலும் விரைவில் உலகின் மூன்றாவது பெரிய பொருளாதாரமாக மாறும். 2017-ல் ஒரே நாடு, ஒரே வரி அறிமுகப்படுத்தப்பட்டது. தற்போது, மேலும் பெரிய சீர்திருத்தங்களை கொண்டு வர முயற்சிகள் நடைபெறுகின்றன.
சில வாரங்களுக்கு முன்பு எமது நாடாளுமன்றம் எளிமைப்படுத்தப்பட்ட வருமான வரி முறையை அங்கீகரித்தது. இவை வரிவிதிப்பைத் தாண்டி, வணிகம் செய்ய எளிதாக செய்யும் முயற்சிகளாகும். வணிகத்திற்கான ஒற்றை டிஜிட்டல் சாளர ஒப்புதலை வழங்கியுள்ளோம்.
பாதுகாப்பு, விண்வெளி உள்ளிட்ட முக்கிய துறைகள் ஏற்கனவே தனியார் துறைக்கு திறந்து விடப்பட்டுள்ளன; இப்போது அணுசக்தித் துறையையும் திறக்க உள்ளோம். இந்த சீர்திருத்தங்கள் வளர்ந்த இந்தியாவை கட்டமைக்க உதவும்.
உலகம் இன்று இந்தியாவை வெறுமனே பார்க்கவில்லை; இந்தியாவை கவனித்து, மேற்கொள்ளப்பட்ட சீர்திருத்தங்களை பாராட்டுகிறது.
ஆட்டோமொபைல் துறையில் இந்தியா-ஜப்பான் கூட்டாண்மை வெற்றிகரமாக உள்ளது. உலகளாவிய தெற்கின், குறிப்பாக ஆப்பிரிக்கா வளர்ச்சிக்கு இந்தியா பங்களிக்க முடியும். வாருங்கள், இந்தியாவில் உற்பத்தி செய்யுங்கள், உலகத்திற்கு உற்பத்தி செய்யுங்கள்.
செயற்கை நுண்ணறிவு, குறைக்கடத்திகள், குவாண்டம் கணினியியல், உயிரி தொழில்நுட்பம் மற்றும் விண்வெளி துறைகளில் இந்தியா துணிச்சலான முயற்சிகளை மேற்கொண்டு வருகிறது. ஜப்பானின் தொழில்நுட்பமும் இந்தியாவின் திறமையும் இணைந்து இந்த நூற்றாண்டின் தொழில்நுட்பப் புரட்சியை வழிநடத்த முடியும்” என்று பிரதமர் மோடி உரையாற்றினார்.
