குடியரசு துணைத் தலைவர் தேர்தலில் வாக்களிப்பை தவிர்க்க பிஜு ஜனதா தளம் தீர்மானம்
குடியரசு துணைத் தலைவர் தேர்தலில் பங்கேற்காமல் இருப்பதாக ஒடிசாவின் முக்கிய அரசியல் கட்சியான பிஜு ஜனதா தளம் (பிஜேடி) அறிவித்துள்ளது.
புவனேஸ்வரில் செய்தியாளர்களிடம் பேசிய பிஜேடி எம்.பி. சஸ்மித் பத்ரா கூறியதாவது:
“குடியரசு துணைத் தலைவர் தேர்தலில் எங்கள் எம்.பிக்கள் வாக்களிக்கமாட்டார்கள் என்று கட்சித் தலைவர் நவீன் பட்நாயக் முடிவு செய்துள்ளார். இந்த தீர்மானம் கட்சியின் மூத்த தலைவர்கள், அரசியல் விவகாரக் குழு மற்றும் எம்.பிக்களுடன் ஆலோசனை நடத்தி எடுக்கப்பட்டது.
பாஜக தலைமையிலான என்.டி.ஏ மற்றும் காங்கிரஸ் தலைமையிலான இந்தியா கூட்டணி ஆகிய இரண்டிலிருந்தும் தூரமாக இருக்க வேண்டும் என்பது எங்கள் கட்சியின் கொள்கை. எங்களின் பிரதான கவனம் ஒடிசா மாநில மக்களின் முன்னேற்றமே” என அவர் குறிப்பிட்டார்.
பிஜேடி-யின் இந்த முடிவை பாஜக வரவேற்றது. மத்திய அமைச்சர் ஜூவல் ஓரம், “வாக்களிப்பை புறக்கணிப்பதன் மூலம், என்.டி.ஏ வேட்பாளரை நவீன் பட்நாயக் மறைமுகமாக ஆதரித்துள்ளார். இது சி.பி. ராதாகிருஷ்ணனின் வெற்றிக்கு சாதகமாக இருக்கும்” என்றார். இதேபோல், பாஜக எம்.பி. பிரதீப் புரோஹித்தும், “நவீன் பட்நாயக் என்.டி.ஏ வேட்பாளரை எதிர்க்கவில்லை” என தெரிவித்தார்.
இதே நேரத்தில், பிஜேடி-யின் இந்த முடிவை காங்கிரஸ் கடுமையாக விமர்சித்தது. மாநில காங்கிரஸ் தலைவர் பக்த சரண் தாஸ், “வாக்களிக்காமல் இருப்பது என்பது பாஜகவுக்கு ஆதரவு அளிப்பதற்குச் சமம். பிஜேடி உண்மையில் பாஜக முகாமை எதிர்க்கிறது என்பதை நிரூபிக்க இது நல்ல வாய்ப்பாக இருந்தது. ஆனால் அந்த வாய்ப்பை கட்சி தவறவிட்டுள்ளது” என்றார்.
குறிப்பாக, 2012ஆம் ஆண்டு குடியரசு துணைத் தலைவர் தேர்தலையும் பிஜேடி புறக்கணித்தது குறிப்பிடத்தக்கது.
