டெல்லி – மீரட் பாதையில் நமோ பாரத் ரயில் மணிக்கு 160 கி.மீ வேகத்தில் சோதனை

டெல்லியிலிருந்து மீரட் வரை 84 கிலோமீட்டர் தூரத்திற்கு ரூ.30,274 கோடி செலவில் புதிய ரயில் பாதை அமைக்கும் பணிகள் நடைபெற்று வருகின்றன. இதில் 55 கிலோமீட்டர் பகுதியில் அதிவேக ரயில் பாதை உருவாக்கப்பட்டுள்ளது. அங்கு நமோ பாரத் ரயில் மணிக்கு 160 கி.மீ வேகத்தில் இயக்கப்பட்டது.

கிழக்கு டெல்லியின் நியூ அசோக் நகர் நிலையத்திலிருந்து உத்தரப் பிரதேசத்தின் தெற்கு மீரட் வரை 15 நிமிட இடைவெளியில் 30 நமோ பாரத் ரயில்கள் ஓடுகின்றன. ஒவ்வொரு ரயிலிலும் 6 பெட்டிகள் உள்ளன. இந்த பாதையில் 11 ரயில் நிலையங்கள் வழியாக செல்லும் போது சில விநாடிகள் மட்டும் ரயில் அதிகபட்சமாக 160 கி.மீ வேகத்தை அடையும்.

முன்பு 2016ஆம் ஆண்டு கதிமேன் எக்ஸ்பிரஸ் ரயில், ஹஸ்ரத் நிசாமுதீன் – ஆக்ரா இடையே சிறப்பு பாதையில் மணிக்கு 160 கி.மீ வேகத்தில் இயக்கப்பட்டது. பின்னர் வந்தே பாரத் ரயிலும் இதே பாதையில் சோதனைக்காக 160 கி.மீ வேகத்தில் இயக்கப்பட்டது. ஆனால் பின்னர் இவ்விரண்டு ரயில்களும் 160 கி.மீ வேகத்திலிருந்து 130 கி.மீ-க்கு குறைக்கப்பட்டன.

தற்போது 160 கி.மீ வேகத்தில் இயங்குவது நமோ பாரத் ரயில்கள் மட்டுமே. இந்த ரயில்கள் ஹைதராபாத்தில் வடிவமைக்கப்பட்டு, குஜராத்தில் தயாரிக்கப்படுகின்றன.

அடுத்த கட்டமாக டெல்லி சாராய் கலே கான் நிலையத்திலிருந்து உத்தரப் பிரதேசத்தின் மோதிபுரம் வரை மொத்தம் 82.15 கி.மீ தூரத்திலுள்ள 16 நிலையங்களிலும் விரைவில் ரயில் சேவை தொடங்கப்பட உள்ளது.