‘சமூக நீதி பறிக்கப்படுகிறது…’ – தற்கொலை செய்த மூத்த ஐபிஎஸ் அதிகாரியின் மனைவிக்கு சோனியா காந்தி கடிதம்
அதிகாரத்தில் உள்ள சிலர் காட்டும் பாகுபாடான அணுகுமுறை, மூத்த அதிகாரிகளின் சமூக நீதியையும் களவாடுகிறது என்று தற்கொலை செய்த ஹரியானா ஐபிஎஸ் அதிகாரி புரன் குமாரின் மனைவிக்கு, காங்கிரஸ் மூத்த தலைவர் சோனியா காந்தி கடிதம் மூலம் தெரிவித்தார்.
ஹரியானாவின் மூத்த ஐபிஎஸ் அதிகாரியான புரன் குமார், அக்டோபர் 7-ந் தேதி சண்டிகரில் உள்ள செக்டார் 11 இல்லத்தில் துப்பாக்கியால் தற்கொலை செய்து கொண்டார். 2001-ஆம் ஆண்டு பேட்ச் அதிகாரியாக தொடங்கி, பிறகு ஏடிஜிபி பதவியிலிருந்தார். அவரின் மனைவி அம்னீத் பி குமார் ஐஏஎஸ் அதிகாரியாக, ஹரியானா அரசின் வெளியுறவு ஒத்துழைப்புத் துறையின் இயக்குனர் மற்றும் செயலாளராக பணியாற்றுகிறார்.
சோனியா காந்தி, அம்னீத் பி குமாருக்கு எழுதிய கடிதத்தில், “உங்கள் கணவர், மூத்த ஐபிஎஸ் அதிகாரி புரன் குமார் உயிரிழந்த செய்தி மிகுந்த அதிர்ச்சியையும் ஆழ்ந்த சோகத்தையும் ஏற்படுத்துகிறது. இந்த கடுமையான நேரத்தில் உங்களுக்கும் உங்கள் குடும்பத்தினருக்கும் எனது ஆழ்ந்த இரங்கலை தெரிவிக்கிறேன்.
புரன் குமாரின் திடீர் மறைவு, அதிகாரத்தில் உள்ள சிலர் காட்டும் பாகுபாடான நடத்தை மூத்த அதிகாரிகளின் சமூக நீதியை இன்றைய தினமும் களவாடுவதாகவே உள்ளது என்பதைக் காட்டுகிறது. நீதிக்கான போராட்டத்தில், நானும் நாட்டின் லட்சக்கணக்கான மக்கள் உங்களுடன் இருக்கிறோம்,” எனக் கூறினார்.
பட்டியல் சமூகத்தைச் சேர்ந்த ஐபிஎஸ் அதிகாரி புரன் குமார், 8 பக்க கொண்ட தற்கொலைக் குறிப்பை தட்டச்சு செய்து கையொப்பமிட்டுள்ளார். அதில், ஆகஸ்ட் 2020 முதல் ஹரியானாவின் சம்பந்தப்பட்ட மூத்த அதிகாரிகள் நடத்திய சாதி அடிப்படையிலான தாக்கங்கள், இலக்கு வைக்கப்பட்ட மன அழுத்தம், பொது அவமரியாதை மற்றும் அட்டூழியங்களை அவர் மிகச் சரியாக விளக்கி எழுதியுள்ளார்.
