உத்தரபிரதேசத்தில் ஆளும் பாஜகவில் தற்போது பெரும் உள்கட்சி மோதல் வெடித்துள்ளது. அங்கு யோகி ஆதித்யநாத் முதல்வராக இருக்கும் நிலையில், துணை முதல்வர் மவுரியா அவருக்கு எதிராக விமர்சனங்களை முன்வைத்துள்ளார். இதனால் அங்கு பதற்றமான சூழல் ஏற்பட்டுள்ளது.
உத்தரப்பிரதேசத்தில் சமீபத்தில் நடந்து முடிந்த மக்களவைத் தேர்தலில் பாஜக கூட்டணி எதிர்பார்த்த வெற்றியைப் பெறவில்லை. இந்தத் தேர்தல் முடிவுகள் குறித்த ஆலோசனைக் கூட்டம் அண்மையில் நடைபெற்றது.
இந்த ஆலோசனை கூட்டத்தில் எழுப்பப்பட்ட பல விஷயங்கள் பெரும் விவாதத்தை கிளப்பியுள்ளதாக கூறப்படுகிறது. விரைவில் உத்தரபிரதேசத்தில் பல மாற்றங்கள் வரலாம் என்றும் கூறப்படுகிறது
பீதி: லோக்சபா தேர்தலில் முதல்வர் யோகி ஆதித்யநாத் எதிர்பார்த்த வெற்றியை பெறவில்லை என சஞ்சய் நிஷாத் தலைமையிலான நிஷாத் கட்சி மற்றும் அனுப்ரியா படேல் தலைமையிலான அப்னா தளம் (சோனேலால்) போன்ற கூட்டணி கட்சிகள் குற்றம் சாட்டின. ஒருபுறம் அமைச்சரவை கூட்டம் உள்ளிட்ட முக்கிய கூட்டங்களில் துணை முதல்வர் கேசவ் பிரசாத் மவுரியா பங்கேற்காதது பரபரப்பை ஏற்படுத்தியது.
மௌரியா: சமீபத்தில் உ.பி.தலைநகர் லக்னோவில் நடைபெற்ற உத்தரபிரதேச பாஜக செயற்குழு கூட்டத்தில் முதல்வர் ஆதித்யநாத்தை மவுரியா வெளிப்படையாகவே சாடியதாக தகவல் வெளியாகியுள்ளது. முதல்வர் யோகியின் செயல்பாடுகளால் பாஜகவில் பலர் அதிருப்தியில் இருப்பதாக கூறப்படும் நிலையில், மவுரியாவின் விமர்சனம் முக்கியத்துவம் வாய்ந்ததாக பார்க்கப்படுகிறது. அந்த கூட்டத்தில் மவுரியா, “பாஜக தொண்டர்களின் வலி எனக்கும் ஒன்றுதான். ஆட்சியை விட கட்சி பெரிது. கட்சியை விட பெரியவர்கள் யாரும் இல்லை” என்று கூறினார்.
அதே நேரத்தில் தேர்தல் தோல்வி குறித்து யோகி ஆதித்யநாத் பல்வேறு கருத்துக்களை தெரிவித்திருந்தார். வேறு வார்த்தைகளில் கூறுவதானால், தேர்தல் தோல்விக்கு அதீத நம்பிக்கை மற்றும் கூட்டணிக் கட்சிகள் அந்தந்த சமூகங்களின் வாக்குகளைப் பிடிக்கத் தவறியதே காரணம் என்று யோகி கூறினாலும், மௌரியாவின் கருத்துகள் இதற்கு நேர்மாறாக உள்ளன.
டெல்லி தலைமை: இரு தரப்பினருக்கும் இடையே மோதல் நடந்து வரும் நிலையில், நிலைமையைக் கட்டுப்படுத்த பாஜக டெல்லி தலைமை முயற்சித்து வருகிறது. பாஜக தேசிய தலைவர் ஜேபி நட்டா மவுரியாவை சந்தித்தார். மேலும், உத்தரப் பிரதேச முதல்வர் பூபேந்திர சிங், பிரதமர் நரேந்திர மோடியை டெல்லியில் புதன்கிழமை சந்தித்துப் பேசினார்.
நெருக்கடியை சமாளிக்க உத்தரபிரதேசத்திற்கு புதிய பாஜக தலைவர் நியமிக்கப்படலாம் என்ற தகவல்களுக்கு மத்தியில் இந்த சந்திப்பு வந்துள்ளது.
மவுரியாவுக்கு முக்கிய பதவி: கட்சியில் மவுரியாவுக்கு மிக முக்கிய பதவி வழங்கப்படும் என கூறப்படுகிறது. மௌரியா உத்தரபிரதேசத்தில் செல்வாக்கு மிக்க OBC முகமாக உள்ளார். மேலும், அவருக்கு ஆர்எஸ்எஸ் ஆதரவும் உள்ளது. இதனால் அவருக்கு முக்கிய பதவி வழங்கப்படலாம் என கூறப்படுகிறது. மேலும், பூபேந்திர சிங் உத்தரபிரதேச மாநில தலைவராக உள்ளதால், அவருக்கு பதிலாக மற்றொரு ஓபிசி தலைவர் உ.பி., தலைவராக நியமிக்கப்படலாம் என கூறப்படுகிறது.
யோகி ஆதித்யநாத்: இதேபோல் உத்தரபிரதேச முதல்வர் பதவியில் இருந்து யோகி ஆதித்யநாத் நீக்கப்படலாம் என தகவல் வெளியானது. ஆனால், தற்போது டெல்லி தலைமையிடம் அதுபோன்ற திட்டங்கள் எதுவும் இல்லை. தற்போதைய சூழலில் யோகி ஆதித்யநாத் முதலமைச்சராக நீடிப்பார் என்றும் கட்சி ரீதியாக மட்டுமே மாற்றங்கள் செய்யப்படும் என்றும் கூறப்படுகிறது.
