மாங்காய் கொள்முதல் இல்லை – கிருஷ்ணகிரி விவசாயிகள் வேதனை
ஆந்திரா அரசு மா கொள்முதல் செய்வதற்காக மானியம் வழங்குவதால், அந்த மாநிலத்திலிருந்தும் மற்றும் பிற மாநிலங்களிலிருந்தும் மாங்காய்கள் வாங்குவது நிறுத்தப்பட்டுள்ளது. இதன் விளைவாக, கிருஷ்ணகிரி மாவட்ட விவசாயிகள் கடும் பாதிப்பை எதிர்கொள்கிறார்கள்.
இந்த மாவட்டத்தில் ஆண்டுக்கு சுமார் 35 ஆயிரம் ஹெக்டேரில் 1.5 லட்சம் மெட்ரிக் டன் மாம்பழங்கள் விளைவிக்கப்படுகிறது. அல்போன்ஸா, தோத்தாபுரி, பங்கனப்பள்ளி, நீலம், செந்தூரா, மல்கோவா, பீத்தர் ஆகிய சுவையான ரகங்கள் இங்கு அதிக அளவில் பயிரிடப்படுகின்றன. இங்கு பலர் விவசாயத்தை முழுமையான வாழ்வாதாரமாக கொண்டுள்ளனர். இந்த ஆண்டு சராசரி அளவைக் காட்டிலும் அதிக மழை காரணமாக இரட்டை மகசூல் கிடைத்துள்ளது. ஆனால், நோய் தாக்கம் மற்றும் விலை வீழ்ச்சி ஆகியவற்றால் விவசாயிகள் பெரிதும் பாதிக்கப்பட்டுள்ளனர்.
இங்கு விளையும் மா ரகங்களில் தோத்தாபுரி ரகம் 80% ஆக உள்ளது. இது முக்கியமாக மாங்கூழ் தயாரிக்க பயன்படுகிறது. தற்போது இரண்டு முறை மா முத்தரப்பு கூட்டங்கள் நடந்தும், சரியான கொள்முதல் விலை நிர்ணயம் செய்யப்படவில்லை. இதனால் விவசாயிகளுக்கு வருவாய் கிடைக்காமல், பறித்த மாங்காய்களை சாலையோரம் எறியும் நிலை உருவாகியுள்ளது.
முத்தரப்பு கூட்டங்கள் பலனளிக்கவில்லை
விவசாயிகள் சங்கத் தலைவர் சவுந்திரராஜன் உள்ளிட்டோர் தெரிவித்ததாவது, முத்தரப்பு கூட்டங்கள் பயனின்றி முடிந்துவிட்டன. தற்போது தோத்தாபுரி ரக மாங்காய்கள் மண்டிகளில் கிலோ ரூ.3 முதல் ரூ.5 வரை, மாங்கூழ் நிறுவனங்கள் ரூ.5–6 வரை கொள்முதல் செய்கின்றன. இதனால் தொழிலாளர்களுக்குக் கூலி கொடுக்க முடியாத நிலை உள்ளது.
ஆந்திராவுக்கு மானியம் – தமிழகம் புறக்கணிப்பு
ஆந்திர மாநிலம், சித்தூரில் நடந்த கூட்டத்தில், மாங்காய்களின் கொள்முதல் விலை ரூ.12 என நிர்ணயம் செய்யப்பட்டது. இதில் ரூ.8 தொழிற்சாலைகள் வழங்க, ரூ.4 அரசு மானியமாக தருகிறது. மேலும், அந்த மாநிலத்தில் உள்ள விவசாயிகளை பாதுகாக்க, வெளிமாநில மாங்காய்கள் கொள்முதல் செய்ய தடை விதிக்கப்பட்டுள்ளது.
ஆனால் தமிழகத்தில் மா விவசாயிகளுக்காக இதுபோன்ற பாதுகாப்பு இல்லை. தோட்டக்கலை, வேளாண்மை மற்றும் விவசாய வணிகத்துறை இடையே ஒருங்கிணைப்பு இல்லாததால், விவசாயிகள் மிகுந்த நெருக்கடியில் உள்ளனர்.
விவசாயிகள் கோரிக்கை
தமிழக அரசு, ஆந்திராவைப் போலவே உடனடியாக கொள்முதல் விலையை நிர்ணயித்து மானியம் வழங்க வேண்டும். மேலும், இந்த ஆண்டு பாதிக்கப்பட்ட விவசாயிகளுக்கு, ஏக்கருக்கு ரூ.50,000 இழப்பீடு வழங்க வேண்டும் என விவசாயிகள் வலியுறுத்துகிறார்கள்.
