“உலகளவில் வருமான சமத்துவம் அதிகம் காணப்படும் நாடுகளில் இந்தியா நான்காவது இடத்தில் உள்ளது” என உலக வங்கி வெளியிட்ட புதிய அறிக்கை தெரிவிக்கிறது.

‘வறுமை மற்றும் வருமான சமத்துவம்’ குறித்த உலக வங்கியின் கினி குறியீட்டு அறிக்கையில் இந்த தகவல் வெளியிடப்பட்டுள்ளது. கினி குறியீடு என்பது ஒரு நாட்டில் மக்கள் இடையே வருமானமும் செல்வமும் எவ்வளவு சமமாக பகிரப்பட்டுள்ளது என்பதை அளவிடும் கருவி ஆகும். இந்த குறியீட்டில் மதிப்பெண்கள் 0 முதல் 100 வரை அமைகின்றன:

• 0 என்றால் முழுமையான சமத்துவம்,
• 100 என்றால் மிகுந்த சமத்துவமின்மை என்பதை குறிக்கின்றது.

இக்கணக்கீட்டில் குறைந்த மதிப்பெண் பெறும் நாடுகள், அதிக சமத்துவம் உள்ள நாடுகளாக கருதப்படுகின்றன.

இந்த ஆண்டு வெளியான அறிக்கையின்படி, இந்தியாவின் கினி குறியீட்டு மதிப்பெண் 25.5 ஆக உள்ளது. இதன் அடிப்படையில், உலக நாடுகளின் வரிசையில் இந்தியா நான்காவது இடத்தில் வருமான சமத்துவத்தில் இருக்கிறது. இந்தியாவுக்கு மேலாக ஸ்லோவாக் குடியரசு (24.1), ஸ்லோவேனியா (24.3), மற்றும் பெலாரஸ் (24.4) ஆகிய நாடுகள் முதல் மூன்று இடங்களில் உள்ளன.

கடந்த 2011-ம் ஆண்டில் இந்தியாவின் கினி மதிப்பெண் 28.8 ஆக இருந்த நிலையில், தற்போது 25.5 ஆக குறைந்திருப்பது, சமத்துவத்தில் ஏற்பட்ட முன்னேற்றத்தை வெளிப்படுத்துகிறது.

முக்கியமாக, அமெரிக்கா (41.8) மற்றும் சீனா (35.7) உள்ளிட்ட உலகின் முன்னணி பொருளாதாரங்களுடன் ஒப்பிடும்போது இந்தியா மேலோங்கி உள்ளது. ஜி-7 மற்றும் ஜி-20 போன்ற பெரிய நாடுகளைக் கடந்துள்ளது.

2011 முதல் 2023 வரை இந்தியாவில் 17.1 கோடி மக்கள் கடும் வறுமை நிலையிலிருந்து வெளியேறியுள்ளனர் என்பதும் இந்த அறிக்கையில் குறிப்பிடப்பட்டுள்ளது. அதே காலகட்டத்தில், வறுமையில் வாழும் மக்களின் விகிதம் 16.2% லிருந்து 2.3% ஆகக் குறைந்துள்ளது என்பது குறிப்பிடத்தக்கது.

இந்த முன்னேற்றத்திற்கு முக்கிய காரணமாக மத்திய அரசின் பல்வேறு திட்டங்கள் உள்ளன.

அதாவது:

• பிரதமர் ஜன் தன் யோஜனா (55 கோடி மக்களுக்கு வங்கி கணக்குகள் திறக்கப்பட்டது),
• ஆதார் அட்டை திட்டம் (142 கோடிக்கு மேற்பட்ட மக்கள் பதிவு செய்தனர்),
• நலத்திட்ட உதவித் தொகைகளை நேரடியாக மக்களின் வங்கிக்கணக்கில் அனுப்பும் முறை (இதன் மூலம் 2023 மார்ச் வரையில் ₹3.48 லட்சம் கோடி சேமிக்கப்பட்டது),
• ஆயுஷ்மான் பாரத் திட்டம் (இதன் கீழ் 41 கோடி சுகாதார அட்டைகள் வழங்கப்பட்டுள்ளன),
• ஸ்டேண்ட் அப் இந்தியா, பிஎம் விஸ்வகர்மா யோஜனா,
• பிரதம மந்திரி கரிப் கல்யாண் அன்ன யோஜனா (80 கோடி மக்களுக்கு இலவச உணவு தானியங்கள் வழங்கப்பட்டது) ஆகிய திட்டங்கள்.

இத்தகைய திட்டங்கள் மூலம் வறுமையை குறைத்து, வருமான சமத்துவத்தை மேம்படுத்தும் வழியில் இந்தியா விரைந்து செல்லும் நோக்கத்தை வெளிப்படுத்துகிறது.

“சமத்துவமின்மை என்பது கூட விகாசமான நாடுகளுக்கு ஒரு சவாலாக இருக்கின்ற நிலையில், தொழில்நுட்பம் அடிப்படையிலான நிர்வாகம் மூலம் சமத்துவத்தை உருவாக்கும் இந்தியாவின் முயற்சிகள் உலகத்திற்கு ஒரு முன்னுதாரணம்” என மத்திய சமூக நலத்துறை கூறியுள்ளது.