அமெரிக்க வரி சவாலுக்கு எதிராக திருப்பூர் ஜவுளி ஏற்றுமதியாளர்கள் புதிய தீர்மானம்
அமெரிக்க சந்தையில் பின்னலாடை ஏற்றுமதி கடும் சிக்கலில் சிக்கியுள்ள நிலையில், வர்த்தக வாய்ப்புகள் தொடர்ந்து நீடிக்க, திருப்பூர் ஏற்றுமதியாளர்கள் தங்களது உற்பத்தி செலவில் இருந்து 3 முதல் 5 சதவீதம் வரை தள்ளுபடி வழங்க முடிவு செய்துள்ளனர்.
இந்திய பொருட்களுக்கு 50 சதவீத இறக்குமதி வரி விதிக்கும் அமெரிக்க அரசின் அறிவிப்பு, நேற்று முன்தினம் முதல் நடைமுறைக்கு வந்தது. இதன் விளைவாக, நாட்டின் ஜவுளி ஏற்றுமதியில் முக்கிய பங்கு வகிக்கும் திருப்பூர் பின்னலாடை துறை கடுமையாக பாதிக்கப்பட்டுள்ளது.
இது தொடர்பாக திருப்பூர் ஏற்றுமதியாளர்கள் சங்கத் தலைவர் கே.எம். சுப்பிரமணியம் கூறியதாவது:
“அமெரிக்காவுக்கான பின்னலாடை ஏற்றுமதி பெரும் நெருக்கடியில் உள்ளது. கொரோனா காலத்தை எப்படித் தாண்டினோமோ அதுபோல இதையும் சமாளிக்க மத்திய அரசு மானியம் வழங்க வேண்டும் என்று கடிதம் அனுப்பியுள்ளோம். தற்போதைய நிலையை கருத்தில் கொண்டு, 3–5% வரை உற்பத்தி கட்டணத்தில் ஏற்றுமதியாளர்கள் தாங்களே தள்ளுபடி அளிக்க தயாராக உள்ளனர். லாபம் குறைந்தாலும், வியாபாரத்தை தொடர்வதற்காகவே இந்த நடவடிக்கை எடுக்கப்பட்டுள்ளது. தற்போது ரூ.12 ஆயிரம் கோடி மதிப்பிலான ஆண்டு வர்த்தகத்தில், சுமார் ரூ.3 ஆயிரம் கோடி மதிப்புள்ள ஆர்டர்கள் நிறுத்தப்பட்டுள்ளன.” என தெரிவித்தார்.
மேலும், பிரதமர் மோடிக்கு திருப்பூர் எம்.பி. கே. சுப்பராயன் எழுதிய கடிதத்தில்,
“அமெரிக்காவின் வரி விதிப்பால் 30–35% வரை ஏற்றுமதி ஆடை விலை அதிகரிக்கும் அபாயம் உள்ளது. இதனால், சர்வதேச சந்தையில் சீனா, வியட்நாம், வங்கதேசம் போன்ற நாடுகளுடன் இந்திய ஆடைகள் போட்டியிட முடியாத நிலை உருவாகும். இது நீண்டகாலத்தில் திருப்பூர் ஜவுளித் துறைக்கு சரி செய்ய முடியாத சேதத்தை ஏற்படுத்தும். பல லட்சம் தொழிலாளர்கள் வேலை இழக்கும் சூழ்நிலை உருவாகும். எனவே, இந்திய அரசு ஏற்றுமதியாளர்களுக்கும் தொழிலாளர்களுக்கும் பாதுகாப்பான நடவடிக்கைகள் எடுக்க வேண்டும். வங்கிக் கடன், உத்தரவாதம், காப்பீடு, வட்டி மானியம், கடனுதவி, வரிவிலக்கு போன்ற சலுகைகள் வழங்கப்பட வேண்டும். மேலும், அமெரிக்காவின் இந்த வரி விதிப்பை உலக வர்த்தக அமைப்பில் சவால் செய்ய வேண்டும்.” என வலியுறுத்தியுள்ளார்.
