முள் சீத்தாப் பழத்தில் புதிய கண்டுபிடிப்பு: டிப் டீ, பவுடர், மிட்டாய் தயாரித்து வரவேற்பு பெறும் தம்பதி!
ஆஸ்திரேலியாவில் வேலை பார்த்து வந்த துரைபாண்டி – கோமதி தம்பதிகள், சொந்த ஊருக்குத் திரும்பி பழநி அருகே பாப்பம்பட்டியில் இயற்கை முறையில் முள் சீத்தாப் பழங்களை சாகுபடி செய்து, அதிலிருந்து பல்வேறு பொருட்களை தயாரித்து மக்கள் கவனத்தை ஈர்த்துள்ளனர்.
விருதுநகர் மாவட்டம் அருப்புக்கோட்டைச் சேர்ந்த துரைபாண்டி, ஆஸ்திரேலியாவில் பணியாற்றி வந்தார். மனைவி, குழந்தைகளுடன் அங்கு வாழ்ந்த அவர், பிறகு சொந்த நாட்டில் விவசாயம் செய்ய வேண்டும் என்ற எண்ணத்தில் இந்தியா திரும்பினார். ஆனால் அருப்புக்கோட்டையில் தண்ணீர் தட்டுப்பாடு காரணமாக, பாப்பம்பட்டியில் தென்னைத் தோட்டம் வாங்கி சாகுபடி தொடங்கினார்.
அப்போது புற்றுநோய், நீரிழிவு போன்ற நோய்களுக்கு பலன் தரும் தன்மை முள் சீத்தாப் பழத்திற்கு இருப்பதை அறிந்து, 2019-ல் தேனி மற்றும் ஆந்திராவில் இருந்து கன்றுகளை வாங்கி நடவு செய்தனர். எந்த ரசாயனமும், பூச்சிக்கொல்லியும் இல்லாமல், முழுக்க இயற்கை முறையிலேயே பராமரித்து வருகின்றனர். 2022 முதல் அவர்களுக்கு நல்ல மகசூல் கிடைத்து வருகிறது.
மகசூல் கிடைக்கும் காலம்:
- நவம்பர் – பிப்ரவரி
- ஏப்ரல் – ஜூன்
ஒரு பழம் குறைந்தது 800 கிராம் முதல் அதிகபட்சம் 2 கிலோ வரை எடையுடையதாக இருக்கும்.
அறுவடை செய்த முள் சீத்தா பழங்களை விற்பனை செய்வதோடு மட்டுமல்லாமல், மீதமுள்ள பழங்களை வீணாகாமல் காக்கும் நோக்கில் மதிப்புக்கூட்டிய பொருட்களாக மாற்றி வருகின்றனர்.
- பழங்களை உலர்த்தி பவுடர் தயாரிக்கின்றனர் (பால் அல்லது வெந்நீருடன் கலந்து குடிக்கலாம்).
- உலர்த்திய பழங்களை அரைத்து ஜாம், மிட்டாய் செய்கின்றனர்.
- பழ இலைகளை உலர்த்தி டிப் டீ தயாரிக்கின்றனர்.
இந்தப் பொருட்கள் தமிழகம் முழுவதும் விற்பனையாகி நல்ல வரவேற்பைப் பெறுகின்றன.
இதுகுறித்து துரைபாண்டி, கோமதி தம்பதிகள் கூறுகையில்:
“சொந்த ஊரை விட்டுப் பிரிந்து எங்கிருந்தாலும் மன நிறைவு கிடைக்காது. அதனால்தான் விவசாயம் செய்யத் தீர்மானித்தோம். முள் சீத்தாப் பழத்தின் சிறப்பை அறிந்த பின் இதையே சாகுபடியாகத் தேர்வு செய்தோம். இன்று நாங்கள் தயாரிக்கும் பவுடர், மிட்டாய், டிப் டீ ஆகியவற்றுக்கு மக்கள் பெரிதும் வரவேற்பு தருகின்றனர். இயற்கை விவசாயத்தில் பெற்ற மகசூலை ஆரோக்கியமான உணவுப் பொருட்களாக மாற்றுவதில் மகிழ்ச்சி அடைகிறோம்,” என்றனர்.
