சென்னையில் டீ-காபி விலை உயர்வு: டீ ரூ.15, காபி ரூ.20 ஆக நிர்ணயம்
சென்னையில் இன்று முதல் டீ மற்றும் காபி விலை உயர்கிறது. இதனால் டீ-காபி பிரியர்கள் அதிர்ச்சியடைந்துள்ளனர்.
ஐடி நிறுவனங்களில் பணியாளர்கள் முதல் கூலி தொழிலாளர்கள் வரை, அனைவரும் விரும்பி அருந்தும் பானமாக டீ-காபி இருக்கிறது. மக்களின் தினசரி உணவு பழக்கத்தில் இதை தவிர்க்க முடியாத ஒன்று எனவே, வேலைச் செயல்பாடுகளிலும் முக்கிய பங்கு வகிக்கிறது. சென்னை பல டீக்கடைகளில் தற்போது டீ ரூ.12, காபி ரூ.15 விலையில் கிடைக்கிறது. சிறிய கடைகளில் டீ ரூ.10, காபி ரூ.12 விற்பனை செய்யப்படுகிறது.
இந்நிலையில், சென்னையின் பல இடங்களில் டீ விலை அதிரடியாக உயர்த்தப்பட்டுள்ளது. கோயம்பேடு, அடையாறு, மயிலாப்பூர், திருவான்மியூர், புரசைவாக்கம் போன்ற இடங்களில் டீக்கடைகளின் முன், டீ, காபி, பூஸ்ட், ஹார்லிக்ஸ் உள்ளிட்ட பானங்களின் விலை இன்று (செப் 1) முதல் உயர்த்தப்படுவதாக நோட்டீஸ் ஒட்டப்பட்டுள்ளது. அதன்படி டீ ரூ.15, காபி ரூ.20 ஆக நிர்ணயிக்கப்பட்டுள்ளது.
மேலும், லெமன் டீ ரூ.15, பால் டீ ரூ.15, ஸ்பெஷல் டீ ரூ.20, ராகிமால்ட் மற்றும் சுக்கு காபி ரூ.20, ஹார்லிக்ஸ், பூஸ்ட் ரூ.25 விலையில் விற்கப்படும். பார்சல் டீ ரூ.45, பார்சல் காபி ரூ.60, பார்சல் பூஸ்ட் ரூ.70 ஆக விற்பனை செய்யப்பட உள்ளன. பஜ்ஜி, போண்டா, சமோசா ஒன்றுக்கு ரூ.15 வசூலிக்கப்படும்.
சென்னை பெருநகர டீக்கடை உரிமையாளர்கள் சங்கத்தின் பங்கேற்பில் தெரிவிக்கப்பட்டது:
“சென்னையில் 2016-17க்கு பிறகு 8 ஆண்டுகளுக்குப் பிறகு டீ-காபி விலை உயர்ந்துள்ளது. தற்போது வெறும் 20% கடைகள் மட்டுமே விலை உயர்த்தியுள்ளன. மீதமுள்ளவை படிப்படியாக உயர்த்த வாய்ப்பு உள்ளது. பால், காபித் தூள், டீ தூள் விலை உயர்வு, வாடகை, மின் கட்டணம், போக்குவரத்து செலவு அதிகரிப்பு போன்ற காரணங்களால், வாழ்வாதார காரணமாக இந்த விலை உயர்வுக்கு நாம் வந்துள்ளோம்” என்று தெரிவித்துள்ளனர்.
