அடுத்த ஆண்டு முதல் பாதிக்குள் தங்க விலை 10 கிராமுக்கு ரூ.1.25 லட்சம் வரை உயரலாம் – ஐசிஐசிஐ வங்கி ஆய்வு
தங்க விலை வரவிருக்கும் மாதங்களில் மேலும் அதிகரித்து, அடுத்த ஆண்டு முதல் 6 மாதங்களுக்குள் 10 கிராம் தங்கத்தின் விலை ரூ.1.25 லட்சத்தை எட்டும் வாய்ப்புள்ளதாக ஐசிஐசிஐ வங்கியின் பொருளாதார ஆய்வு அறிக்கை கூறுகிறது.
கடந்த சில நாட்களாக தங்க விலை தொடர்ந்து உயர்ந்து கொண்டிருக்கிறது. இதுகுறித்து வெளியிடப்பட்ட அறிக்கையில்,
- சர்வதேச சந்தையில் தங்க விலை இந்த ஆண்டில் மட்டும் 33% அதிகரித்துள்ளதாகவும்,
- அமெரிக்க பெடரல் ரிசர்வ் வட்டி விகிதத்தை குறைக்கும் என எதிர்பார்க்கப்படுவதுடன், அந்நாட்டு பொருளாதார வளர்ச்சி மந்தமடைந்துள்ளதாகவும் குறிப்பிடப்பட்டுள்ளது.
இதன் விளைவாக, தற்போது ஒரு அவுன்ஸ் தங்கம் 3,400 அமெரிக்க டாலர் மதிப்பில் இருந்தாலும், ஆண்டு இறுதிக்குள் 3,600 டாலர், அடுத்த ஆண்டு முதல் பாதிக்குள் 3,800 டாலர் வரை உயரும் என கணிக்கப்பட்டுள்ளது.
இந்தியாவில், 24 காரட் 10 கிராம் தங்கத்தின் விலை ஏற்கனவே ரூ.1 லட்சத்தை கடந்துள்ளது. ஆண்டு இறுதிக்குள் இது ரூ.1.10 லட்சமாகவும், அடுத்த ஆண்டு முதல் ஆறு மாதங்களில் ரூ.1.25 லட்சமாகவும் உயரும் வாய்ப்பு இருப்பதாக ஆய்வில் தெரிவிக்கப்பட்டுள்ளது.
மேலும், ரூபாய் மதிப்பு டாலருடன் ஒப்பிடும் போது சரிவடைந்து வருவதே தங்க விலை அதிகரிக்கக் காரணமாக இருக்கிறது. தற்போது ஒரு டாலருக்கு ரூ.88-ஐ தாண்டியுள்ளது.
இதனுடன், தங்கம் சார்ந்த மியூச்சுவல் ஃபண்ட்களில் இந்திய முதலீட்டாளர்களின் ஈடுபாடும் அதிகரித்து வருகிறது. 2024ஆம் ஆண்டின் முதல் எட்டு மாதங்களில் ரூ.4,520 கோடி முதலீடு செய்யப்பட்ட நிலையில், 2025ஆம் ஆண்டின் அதே காலகட்டத்தில் அது இரட்டிப்பு அளவில் உயர்ந்து ரூ.9,280 கோடியாகியுள்ளது.
