ஒரு பவுன் தங்கம் ரூ.80,000 தாண்டியது – நகை வாங்குவோர் அதிர்ச்சி

தங்கம் விலை வரலாறு காணாத உயர்வை எட்டியுள்ளது. நேற்று ஒருபவுன் தங்கம் ரூ.80,040 என பதிவாகி, புதிய உச்சத்தை தொட்டது.

கடந்த மாதம் 26-ம் தேதி முதல் தங்கத்தின் விலை தினந்தோறும் ஏறிக்கொண்டே வந்தது. அமெரிக்கா இந்திய இறக்குமதி பொருட்களுக்கு 50% வரி விதித்தது, ரூபாய் மதிப்பு டாலருக்கு எதிராக சரிந்தது போன்ற காரணிகள் விலை உயர்வுக்கு காரணமாக அமைந்தன.

நேற்று மட்டும் கிராமுக்கு ரூ.140 உயர்ந்து, பவுனுக்கு ரூ.1,120 அதிகரித்தது. இதனால் ஒரு கிராம் விலை ரூ.10,005 ஆகி, ஐந்து இலக்கத்தில் பதிவு செய்யப்பட்டது. அதேபோல் 24 காரட் சுத்த தங்கம் ஒரு கிராம் ரூ.10,914, ஒரு பவுன் ரூ.87,312 என உயர்ந்தது.

வெள்ளி விலையும் உயர்ந்தது. கிராமுக்கு ரூ.2 அதிகரித்து ரூ.138 ஆனது. கட்டி வெள்ளி கிலோவுக்கு ரூ.2,000 உயர்ந்து, ரூ.1.38 லட்சம் ஆனது.

நவராத்திரி, தீபாவளி பண்டிகைகள் நெருங்கும் நிலையில் தங்க விலை தொடர்ந்து உயர்வது, நகை வாங்க விரும்பும் பொதுமக்களை பெரும் சிரமத்துக்கு உள்ளாக்கியுள்ளது.

கடந்த ஜனவரி 3-ஆம் தேதி ஒரு பவுன் தங்கம் ரூ.58,080 இருந்த நிலையில், தற்போது ரூ.80,040 ஆக உயர்ந்துள்ளது. இதனால் 8 மாதங்களில் மட்டும் ஒரு பவுனுக்கு ரூ.21,960 உயர்வு ஏற்பட்டுள்ளது.