மலையாளத்தில் மிகுந்த வரவேற்பை பெற்ற ‘ஜெய ஜெய ஜெய ஜெயஹே’ திரைப்படம் தற்போது தெலுங்கில் ‘ஓம் சாந்தி சாந்தி சாந்தி ஹாய்’ என்ற புதிய தலைப்பில் மீண்டும் உருவாகியுள்ளது.
பேசில் ஜோசப், தர்ஷனா ராஜேந்திரன், அஜு வர்கீஸ் உள்ளிட்டோர் நடித்த, விபின் தாஸ் இயக்கத்தில் வெளிவந்த ‘ஜெய ஜெய ஜெய ஜெயஹே’ படம், தனது நையாண்டி கலந்த சமூக கருத்துகள் மற்றும் விறுவிறுப்பான கதையம்சத்தால் ரசிகர்களிடையே பெரும் வரவேற்பைப் பெற்றது. இந்த வெற்றிப்படம் தற்போது தெலுங்கு மொழியில் ரீமேக் செய்யப்பட்டிருக்கிறது.
இந்த ரீமேக் திரைப்படத்தில் தருண் பாஸ்கர் மற்றும் இஷா ரெப்பா முக்கிய கதாபாத்திரங்களில் நடித்துள்ளனர். ‘ஓம் சாந்தி சாந்தி சாந்தி ஹாய்’ என்ற பெயருடன் இப்படம் வரும் ஆகஸ்ட் 1ஆம் தேதி வெளியிட திட்டமிடப்பட்டுள்ளது. இதற்கான முதல் அறிமுக வீடியோவையும் படக்குழு அண்மையில் வெளியிட்டுள்ளது. விரைவில் டீஸரும் ட்ரெய்லரும் வெளியாக உள்ளதாகவும் அறிவிக்கப்பட்டுள்ளது.
இப்படத்தை புதிய இயக்குநராக அறிமுகமாகும் ஏ.ஆர். சஜீவ் இயக்கியுள்ளார். தயாரிப்பில் ஸ்ருஜன் யாரபோலு, ஆதித்யா பிட்டி, அனுப் சந்திரசேகரன், சாதிக் சைக் மற்றும் நவீன் சனிவரப்பு ஆகியோர் இணைந்துள்ளனர்.
