விஷ்ணு விஷால் தயாரித்த ‘ஆர்யன்’ – அக்டோபரில் வெளியீடு உறுதி
நடிகர் விஷ்ணு விஷால் தயாரித்து நடித்து வரும் ‘ஆர்யன்’ திரைப்படம் அக்டோபர் மாதம் திரையரங்குகளில் வெளியாக இருப்பதாக படக்குழு அறிவித்துள்ளது. நீண்டகாலமாக நடைபெற்ற இறுதிக்கட்ட பணிகள் முடிவடைந்த நிலையில், விரைவில் இப்படத்தின் விளம்பர நடவடிக்கைகள் தொடங்கவிருக்கின்றன.
சமீபத்தில், தனது நெருங்கிய நண்பர்களுக்காக சிறப்பு திரையிடல் நடத்தி ‘ஆர்யன்’ படத்தை காட்டிய விஷ்ணு விஷால், அவர்களிடமிருந்து பெரும் பாராட்டுகளை பெற்றுள்ளார்.
அறிமுக இயக்குநர் ப்ரவீன் இயக்கியுள்ள இப்படத்தில் ஷ்ரத்தா ஸ்ரீநாத், வாணி போஜன், செல்வராகவன் உள்ளிட்ட பலர் முக்கிய கதாபாத்திரங்களில் நடித்துள்ளனர். ஒளிப்பதிவை விஷ்ணு சுபாஷ் செய்துள்ளார்; இசையை சாம் சி.எஸ் அமைத்துள்ளார்.
‘ஆர்யன்’ பணிகள் நிறைவடைந்த பிறகு, இயக்குநர் செல்லா இயக்கும் தனது அடுத்த படத்திற்கான பணிகளில் விஷ்ணு விஷால் கவனம் செலுத்தவுள்ளார். வேல்ஸ் நிறுவனத்துடன் இணைந்து தயாரிக்கப்படும் அந்த படத்திற்கான அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது.
