‘ஜனநாயகன்’ படத்தில் நடிக்கிறாரா புஸ்ஸி ஆனந்த்?
விஜய் நடிப்பில் உருவாகி வரும் ‘ஜனநாயகன்’ திரைப்படத்தில், தமிழக வெற்றிக் கழக பொதுச் செயலாளர் புஸ்ஸி ஆனந்த் முக்கிய கதாபாத்திரத்தில் நடிக்கிறார் என்ற தகவல் வெளியாகியுள்ளது.
ஹெச். வினோத் இயக்கத்தில், கே.வி.என் நிறுவனம் தயாரிக்கும் இந்த படத்தில் விஜயுடன் பாபி தியோல், பூஜா ஹெக்டே, கவுதம் மேனன், ப்ரியாமணி, மமிதா பைஜு உள்ளிட்ட பலரும் நடித்துள்ளனர். ஒளிப்பதிவை சத்யன் சூரியன், இசையை அனிருத் ரவிச்சந்தர் மேற்கொண்டு வருகின்றனர்.
விஜயின் கடைசி திரைப்படமாக வெளியாகவுள்ளதால், ‘ஜனநாயகன்’ குறித்து ரசிகர்களிடையே மிகுந்த எதிர்பார்ப்பு நிலவி வருகிறது. கடந்த ஜூன் 22 அன்று விஜயின் பிறந்தநாளை முன்னிட்டு, படக்குழு சிறிய க்ளிம்ப்ஸ் வீடியோவை வெளியிட்டது. அதற்கு பிறகு அதிகாரப்பூர்வ அறிவிப்புகள் எதுவும் வெளிவரவில்லை.
இந்நிலையில், படத்தில் புஸ்ஸி ஆனந்த் ஒரு முக்கிய கதாபாத்திரத்தில் நடித்திருப்பதாக தகவல் வெளியாகியுள்ளது. விஜயின் காட்சிகள் முழுமையாக படமாக்கப்பட்ட நிலையில், தற்போது மற்ற காட்சிகள் எடுக்கப்பட்டு வருகின்றன. அதில் புஸ்ஸி ஆனந்த் நடித்த காட்சியும் இடம்பெற்றதாக கூறப்படுகிறது.
மேலும், இந்த படத்தில் இயக்குநர்கள் லோகேஷ் கனகராஜ், அட்லீ, நெல்சன் ஆகியோரும் சிறிய கேமியோ வேடங்களில் தோன்றியுள்ளனர் என்பது குறிப்பிடத்தக்கது.
