“என்னை மாதம்பட்டி ரங்கராஜ் ஏமாற்றிவிட்டு துன்புறுத்தினார்…” – ஜாய் கிரிசில்டா பரபரப்பு புகார்
“என் வயிற்றில் வளர்ந்த கருவை கலைக்கச் சொல்லி, நடிகரும் பிரபல சமையல் கலைஞருமான மாதம்பட்டி ரங்கராஜ் என்னை அடித்து துன்புறுத்தினார்” என்று ஆடை வடிவமைப்பாளர் ஜாய் கிரிசில்டா புகார் தெரிவித்துள்ளார். சென்னை காவல் ஆணையர் அலுவலகத்தில் அளித்த புகாரில், “என்னை மாதம்பட்டி ரங்கராஜ் ஏமாற்றிவிட்டார். அவர்தான் என் குழந்தையின் அப்பா” என்றும் குறிப்பிட்டுள்ளார்.
சமீபத்தில் மாதம்பட்டி ரங்கராஜுக்கும் ஜாய் கிரிசில்டாவுக்கும் திருமணம் நடைபெற்றதாகவும், ஜாய் கிரிசில்டா 6 மாதம் கர்ப்பமாக இருப்பதாகவும் அவர் புகைப்படத்துடன் அறிவித்தார். இதுவரை மாதம்பட்டி ரங்கராஜ் இதற்கு எந்தவொரு பதிலும் வெளியிடவில்லை. அவர் ஏற்கனவே திருமணம் ஆனவர் மற்றும் இரு மகன்கள் உள்ளனர்.
இந்த நிலையில், மாதம்பட்டி ரங்கராஜ் தன்னுடன் வாழ மறுப்பதாகவும், தன்னை தாக்கியதாகவும் கூறி ஜாய் கிரிசில்டா இன்று சென்னை காவல் ஆணையரகத்தில் புகார் அளித்தார். புகார் அளித்த பிறகு செய்தியாளர்களிடம் பேசும் போது ஜாய் கிரிசில்டா கூறினார்: “நான் ஜாய் கிரிசில்டா. மாதம்பட்டி ரங்கராஜின் மனைவி. இப்போது காவல் ஆணையரிடம் புகார் அளித்துள்ளேன். என் கணவர் மாதம்பட்டி ரங்கராஜ் என்னோடு தொடர்பில் இல்லை. அவர் என்னை ஏமாற்றிவிட்டார். அவர்தான் என் குழந்தையின் அப்பா. அவர் இதற்குச் பதில் கூற வேண்டும்.
நான் மற்றும் மாதம்பட்டி ரங்கராஜ் சில ஆண்டுகளாக ஒன்றாக வாழ்ந்து வந்தோம். அவர் மனைவியை பிரிந்து வாழ்வதாக கூறினார். அதைக் நம்பி திருமணத்திற்கு ஒப்புக்கொண்டேன். இரண்டு ஆண்டுகளுக்கு முன்பு எம்.ஆர்.சி. நகரில் திருவேதி அம்மன் கோயிலில் திருமணம் நடந்தது. ஆனால், எங்கள் திருமணத்தை பதிவு செய்யவில்லை.
நான் தற்போது 7 மாதம் கர்ப்பமாக இருக்கிறேன். கடந்த ஒன்றரை மாதங்களாக அவர் என்னோடு தொடர்பில் இல்லை. அவரை தொடர்புகொள்ள முயன்றபோது பலர் தடை செய்தனர். அவர்கள் நண்பர்களாகவோ அல்லது சகோதரர்களாகவோ இருக்கலாம். நான் அவரோடு வாழ விரும்புகிறேன், அதற்காகவே புகார் அளித்துள்ளேன்.
நான் எங்கள் திருமணமும், குழந்தை உருவாகியிருப்பதும் குறித்து வெளியே கூறிய பிறகு மாதம்பட்டி ரங்கராஜ் என்னை சந்தித்தார். கருவைக் கலைக்கச் சொல்லி என்னை அடித்து துன்புறுத்தினார். ஒரு வாரத்திற்கு முன்பு அவரிடம் பேச முயன்ற போது பலர் முன்னிலையில் என்னை தாக்கினார்” என்று ஜாய் கிரிசில்டா தெரிவித்தார்.
