சிம்பு படம் குறித்து வெற்றிமாறன் வெளிப்படுத்திய கதைக்களம்
இயக்குனர் வெற்றிமாறன் – சிம்பு இணையும் அடுத்த படத்தின் கதைக்களம் குறித்து வெற்றிமாறன் பேட்டியொன்றில் விளக்கமளித்துள்ளார்.
வெற்றிமாறன் இயக்கத்தில் உருவாகும் அடுத்த படத்தைப் பற்றிய பல்வேறு தகவல்கள் ஏற்கனவே பரவிக் கொண்டிருக்கின்றன. ஆனால் இதுவரை எந்த அதிகாரப்பூர்வ அறிவிப்பும் வெளியாகவில்லை. சிம்பு நடிக்கும் படத்திற்கான ப்ரோமோ வீடியோ கூட தயாராகி இருந்தாலும், வெளியிடப்படாமல் வைக்கப்பட்டுள்ளது. இந்த படத்தை தயாரிப்பாளர் தாணு உருவாக்கவுள்ளார்.
சிம்பு – வெற்றிமாறன் கூட்டணிப் படம் குறித்து வெற்றிமாறன் கூறியதாவது:
“வடசென்னை படத்தைத் தொடங்கிய போது, அந்த படத்தில் முதலில் சிம்பு தான் நாயகனாக நடிக்க வேண்டியது. ஆனால் சில காரணங்களால் அது சாத்தியமாகவில்லை. பின்னர் தனுஷ் கதாநாயகனாக சேர்ந்ததும், கதை அவருக்கு ஏற்றவாறு மாற்றப்பட்டது.
இப்போது சிம்பு நடிக்கவுள்ள படம் என்னவென்றால், அந்த முதற்கட்டத்தில் சிம்புவுக்காக எழுதப்பட்ட வடசென்னை கதைதான். ஒரே காலகட்டத்தில் வேறொரு இடத்தில் நடக்கும் நிகழ்வுகளை மையமாகக் கொண்டதாக இருக்கும். வடசென்னை படத்தில் நடித்த சில கதாபாத்திரங்களும் இந்த படத்தில் இடம்பெறுவர். ஆனால் ‘அன்பு’வாக நடித்த தனுஷ் மட்டும் இதில் இடம்பெறமாட்டார்” என்று தெரிவித்துள்ளார்.
இதனால், சிம்பு படம் வடசென்னை கதைக்காலத்தில், வேறு பக்கத்தில் நிகழும் கதை என்பதும் உறுதியாகியுள்ளது. ஆனால் படப்பிடிப்பு எப்போது ஆரம்பமாகும் என்பது இன்னும் புதிராகவே உள்ளது.
