பிரபல நகைச்சுவை நடிகர் ரோபோ சங்கர் மரணம்
பிரபல நகைச்சுவை நடிகர் ரோபோ சங்கர் உடல்நலக்குறைவால் (செப்.18) காலமானார். அவருக்கு வயது 46.
விஜய் டிவியில் ஒளிபரப்பான கலக்கப்போவது யாரு நிகழ்ச்சியில்தான் அவர் முதல் பெரிய அளவில் பிரபலமானார். மேடைகளில் “ரோபோ” போல ஆடும் நடனத்தால் தான் இவருக்கு ‘ரோபோ சங்கர்’ என்ற பெயர் கிடைத்தது. சுட்டி அரவிந்துடன் இணைந்து அவர் செய்த நகைச்சுவைகள் அப்போது மிகுந்த வரவேற்பை பெற்றன.
திரைப்படங்களில் சின்ன சின்ன வேடங்களில் நடித்து வந்த அவர், ‘இதற்குத்தானே ஆசைப்பட்டாய் பாலகுமாரா’ படத்தின் மூலம் முக்கியமான கதாபாத்திரம் கிடைத்தது. பின்னர் மாரி, கப்பல், வாயை மூடி பேசவும், வேலைன்னு வந்துட்டா வெள்ளைக்காரன் போன்ற பல படங்களில் நடித்தார்.
சில மாதங்களுக்கு முன்பு மஞ்சள் காமாலை காரணமாக உடல் எடை குறைந்து சிகிச்சை பெற்றார். பின்னர் சிறிது தேறியிருந்தார். ஆனால் அண்மையில் மீண்டும் உடல்நிலை மோசமடைந்ததால், சென்னை பெருங்குடி தனியார் மருத்துவமனையில் அனுமதிக்கப்பட்டார். தீவிர சிகிச்சை பலனின்றி இன்று உயிரிழந்தார்.
இவரது மறைவுக்கு திரையுலக பிரபலங்கள், ரசிகர்கள் பலரும் ஆழ்ந்த இரங்கலைத் தெரிவித்து வருகின்றனர்.
கமல்ஹாசன் இரங்கற்பா
“ரோபோ என்பது புனைப்பெயர் தான். என் அகராதியில் நீ மனிதன்.
ஆதலால் என் தம்பி, போதலால் மட்டும் எனை விட்டு நீங்கி விடுவாயா?
உன் வேலை நீ போனாய். என் வேலை தங்கிவிட்டேன்.
நாளையை எமக்கென நீ விட்டுச் சென்றதால் நாளை நமதே.
